Tempotimor (Díli)-Ministru Agrikultura no Peskas (MAP), Pedro dos Reis hatete, konstrusaun ró rua ne’ebé atu halo kontrola peska ilegál sira iha Kosta Súl sei iha prosesu dezeñu no hein submete ba KNA (Komisaun Nasionál Aprovizionamentu).

"Ró rua ne'e nia prosesu dezeñu ba konstrusaun Ró la'o hela prepara para submete ba CNA para halo prosesu ba tenderizasaun, agora dezeñu la'o hela ita espera katak dezeñu bele remata pelu menus submete ba CNA ne'e tenderizasaun ne'e bele la'o”, dehan Ministru Pedro ba www.tempotimor.com iha palásiu Governu, kuarta (26/01).

Tanba durante ne'e seidauk iha fasilidade ida, hodi fasilita funsionáriu sira hodi Detekta maibé akompaña liuhusi satélite de'it.

"Ita laiha fasilidade atu kontrola, kontrola liuhusi satélite, tanba ne'e mak Ministériu tau osan atu, sosa fó rua ne'e pelu menus mai serbisu ho liña Ministeriál sira seluk ho parte Marítima ninia, tanba ita lakon barak, iha sete milhões”, afirma nia.

Ró rua ne'ebé mak MAP atu sosa hodi kontrola kosta súl no asegura riku sorin sira liliu ró ilegál sira ne'ebé halo peskas ilegál.

"Ya klaru katak, atu kontrola ba Kosta Súl ne'ebé mak peska ilegál barak”, dehan nia.

Preparasaun MAP atu hola ró rua ne'ebé sei iha prosesu dezeñu ne'e sei sosa ho osan millaun US$7.

Antes ne'e Komandante komponente Forsa Naval Lizeira, Kapitaun Fragata João da Silva deklara, durante ne'e Ró husi nasaun seluk liuliu nasaun viziñu sira kontinua hala'o atividade ilegál iha tasi Kosta súl.

"Durante ne'e ita rezista ema Peskadór sira ne'ebé halo atividade ilegál iha ita-nia tasi Kosta Súl ne'e barak, ami iha dadus tanba foin dadauk reforsa tan husi sistema Skyline, ne’ebé kada loron ita deteta atividade Ilegál iha Kosta Súl no ita hatene kedas Ró ne'e nia medida naruk hira no Ró ne'e mai husi nasaun ne’ebé ita hatene kedas tanba sistema automatic detection ne'e sempre fó sai, entaun ita print out fó ba hirarkia mais altu sira”, esplika nia.

Nune'e tuir dadus kada fulan sempre rejistu Ró hamutuk 50 to'o 60 mak halo atividade iha Kosta Súl no Ró balun permanente to’o fulan tolu no  fulan haat.

Ró hirak ne'e maioria husi nasaun Indonézia, Tailándia, Vietname no seluk tan ne’ebé iha Peskadór Ilegál barak. (*)