Tempotimor (Díli)-Governu liuhusi Konsellu Ministrus (Kam) deside hodi fó konfiansa ba Ageu Soares Soares atu lidera hanesan Diretór Ezekutivu Ajénsia Nasionál Planeamentu, Monitorizasaun no Avaliasaun (ANAPMA) ba mandatu tinan haat.
Ministru Prezidénsia Konsellu Ministru (MPKM), Fidelis Leite Magalhães hatete, Ageu ne’ebé assume kna’ar ne’e, tanba preense rekézitu no nia mós iha esperiénsia tinan barak iha área planeamentu nian.
"Ne'e ajensia ida, kuandu iha ajensia ne'e, iha rekézitu sira, katak ema ne'e tenke iha grau de Edukasaun, ne'ebé mak señór ida ohin nomeiadu ne'ebé iha esperiénsia tinan barak, nia iha esperiénsia iha área planeamentu, no sira rekomenda ba assume kargu ida ne'e”, dehan Fidelis hafoin reuniaun Konsellu Ministru iha Palásiu Governu, kuarta (26/01).
Tanba kna’ar refere entrega ba sidadaun ida tenke iha konfiansa, iha Parte relevante sira atubele hala’o kna’ar ho di’ak.
"Kuandu kaer ajensia ida tenke iha konfiansa, no iha duni matenek, para bele halo servisu ho di'ak, ohin Primeiru Ministru hato'o konsellu Ministru laiha obsessun ba proposta refere”, afirma nia.
Rezolusaun Governu ba nomeasaun Ageu Jorge Cardoso, hodi ezerse kna’ar hanesan Diretór Ezekutivu Ajénsia Nasionál Planeamentu, Monitorizasaun no Avaliasaun (ANAPMA) nian ne'e, aprezenta husi Primeiru Ministru (PM), Taur Matan Ruak ba Konsellu Ministru. (*)