Diretór Diresaun Teras Propriedade (DTP) Munisípiu Baukau Raimundo de Jesus Barros hatete, iha tinan 2021 ba kotuk halo ona identifikasaun provizóriu rai no uma estadu iha Munisípiu Baukau hamutuk 901, uma 145 mak iha ona atribuisaun arendamentu (selu) no alokasaun atendementu públiku (edifísiu) hamutuk 79.
"Iha tinan kotuk ne'e, totál reseitas ba arendamentu iha Munisípiu Baukau nian hamutuk rihun US$ 20,015.00 husi rai no uma estadu nian, komunidade sira ne'ebé okupa rai estadu ne'e, hamutuk 145 nia taxa mak hamutuk rihun US$20,015.00," dehan Raimundo, segunda (24/01).
Maibé, taxa ne’e, foin implementa de'it iha Postu Administrativu Baukau Vila no tuir planu sei kontinua esforsu hodi kobre to'o Baguia, Kelikai, Laga, Venilale no Vemase.
"Sira ne'e mak seidauk selu mós ami sei esforsu selu taxa ba estadu liuhusi kontratu arendamentu hotu-hotu sei aplika kontratu ba komunidade sira ne'ebé okupa rai estadu sira ne'e," nia informa
Nia haktuir, prosesu atu selu taxa tenke liuhusi edifísiu DTP Munisípal foti resibu lori ba Banku hodi selu.
Nune'e mós, atu selu sei tuir avalisaun kadastru ne'ebé estabelese ona, tanba rai no uma balun medida lahanesan, maibé bainhira okupa medida uma no rai boot selu mós montante boot, ki'ik selu montante ki'ik.
"Selu ne'e, tanba bazeia ba lei Nu.01/2013 katak, rai ne'ebé estadu nian sira okupa, nia tenke selu taxa ba estadu liuhusi kontratu arendamentu," nia afirma
Nune'e, iha tinan 2022 sei esforsu hodi rekolla dadus ba komunidade ne'ebé okupa rai no uma estadu iha Munisípiu Baukau sei selu hotu taxa ba estadu. (*)
