Diretóra Programa Nasionál Desenvolvimentu Suku (PNDS) Munisípiu Baukau, Amélia Maria Viegas hateten, orsamentu infreastrutura ba UKL iha Suku 59 hamutuk US$ 9,419,802 no orsamentu ba operasional US$ 359,718.
"Ita nia UKL ba tinan 2022 implementa iha Suku 59 hotu, ita nia uma ne'ebé kobre iha Munisípiu Baukau kona uma hamutuk 553 ho nia orsamentu hamutuk milloes US$ 9,779,520," dehan nia, tersa (18/01).
Maibé, iha mudansa polítika implementasaun UKL iha tinan 2022 sei la hanesan ho implementasaun UKL iha tinan 2021, tanba sei aumeta deklarasaun na'in ba rai no justifikasaun ema kbi'it la'ek ne'ebé kandidatu benefisiáriu sira prense tuir kondisaun ne'ebé implementa tiha ona iha tinan 2021.
Ékipa verifikasaun nafatin kompostu husi ema na'in-8, ne’ebé lidera husi Xefe Suku, reprezentante joven, Xefe Aldeia, OPS, reprezentante veteranu, inklui reprezentante relijiaun.
"Depois ita implementa mós aldeia albu, kada aldeia sei hetan uma tuir nia númeru, aldeia 5 to'o 7 sei hetan uma 9, aldeia tolu nafatin implementa kada aldeai ida uma 3, hanesan mós iha aldeia 8 to'o 21 ita implementa uma 12 implementa iha aldeia 4 nafatin la'o ho uma tolu tolu," nia hatete
Nune'e, Sekretáriu PNDS nasionál hahú prepara ona orsamentu ba Munisípiu Baukau atu implementa UKL tinan 2022 ne’ebé sei aloka tuir distánsia implementa UKL, Suku Urbana ho Suku remotas nia montante orsamentu la hanesan.
"Nia montante ha'u labele fó fiksu, tanba ita sei haree fali husi survey husi transporte ba iha remotas mobilizasaun matérial rai henek hira la hanesan ho área urbana, ita sei halo fali survey fatin presu atu implementa," nia akresenta
Alende ne'e, iha tinan 2021 implementa UKL iha Munisípiu Baukau hamutuk 177, dadaun hela uma 3 iha Aldeia Asanunu, Suku Soba, Postu Administrativu Laga mak seidauk, tanba problema iha dalan.
"Uma 3 mak seidauk implementa totál, suku 58 implementa hotu ona, balun atinji ona pursentu 100 balun seidauk nia progresu iha hotu ona liu pursentu 50 hanesan ne'e," nia haktuir
Nune'e, Xefe Suku Utu-Haco, Postu Venilale, Cris Correia Xefe sente kontente no apresia ba UKL ne'ebé kontinua la'o hodi apoiu família kbi'it la'ek sira.
"Ida ne'e mak povu hein iha baze, karik ne'e mak aumenta tan uma UKL ami prontu nafatin atu kopera ho programa ne'e to'o susesu," nia promete. (*)
