Print this page

MF-KOICA Selebra Akordu Subvensaun Millaun US$7,86 ba 'Projetu 5S'

By January 15, 2022 886
Ministru Finansa (MF), Rui Gomes ho Ajénsia Kooperasaun Internasionál Koreia (KOICA) asina hela akordu subvensaun iha Ministeriu Finansa, Ai-tarak Laran, kinta (14/01). Ministru Finansa (MF), Rui Gomes ho Ajénsia Kooperasaun Internasionál Koreia (KOICA) asina hela akordu subvensaun iha Ministeriu Finansa, Ai-tarak Laran, kinta (14/01). Foto Suplay

Tempotimor (Dili)-Governu liuhusi Ministériu Finansa (MF) ho Ajénsia Kooperasaun Internasionál Koreia (KOICA) selebra Akordu Subvensaun no Kontribuisaun Finanseira hamutuk US$7.860.000 hodi implementa projetu Hateten Lae ba 5S hanesan (Hamlaha, Elmintíaze ne’ebé transmite husi rai, Moras Kulit, Fuma no Bebidas Midar-Alkólika iha Eskola sira).

Hafoin asinatura akordu ne'e, Ministru Finansa, Rui Augusto Gomes hatete, pozisaun Governu kompretidu dezenvolve protesaun ba subrevivensia labarik timoroan nian.

“Governu Timor-Leste komprometidu ba labarik Timoroan sira-nia sobrevivénsia, dezenvolvimentu no protesaun”, dehan Ministru Rui iha MF Aitarak Laran, sesta (14/01).

Tanba husi projetu ne’ebé Governu ho KOICA asina, sei implementa mós husi Nasaun Unida nia Programa Alimentár Mundiál (WFP) no Organizasaun Mundiál Saúde (WHO), iha ne’ebé sei fornese Pakote Saúde Primária no Edukasaun Saúde ba labarik idade eskolár hodi reduz risku moras oioin iha eskola.

Projetu ne’e sei envolve partisipasaun husi Departamentu Governamentál sira ne’ebé responsável iha área Edukasaun no Saúde ho nia alvu prinsipál mak eskola primária no pre-sekundária hamutuk 400 (estudante idade eskolár rihun 300 resin) iha Munisípiu Baukau, Bobonaro no Manufahi ne’ebé mak implementa hela programa merenda eskolar ho arroz fortificado.

Purtantu iha OJE 2022, Governu introduz ona Markadór Infantil, Programa Bolsa da Mãe Jerasaun Foun no Programa Merenda Eskolar ne’ebé aliña ho Planu Estratéjiku Dezenvolvimentu Nasionál no Objetivu Dezenvolvimentu Sustentável.

Nune'e Governu fiar katak investimentu iha redusaun mánutrisaun, la’ós de’it Investimentu ne’ebé loos maibé Investimentu ne’ebé Estratéjiku ba oan sira. Bainhira labarik ida saudável no edukadu, mak nia preparadu no iha prontidaun di’akliu atu lidera Rai ne’e bá oin.

Pozisaun Governu apresia sinseru ba Governu Korea Súl no Povu Koreianu ba sira-nia apoiu jenerozu hodi rezolve problema estruturál ida iha Timor-Leste, nomós Organizasaun Nasoins Unidas liuhusi WHO no WFP ne’ebé sei fornese asisténsia téknika no administrava.

Ho ida ne'e husu atensaun ba Departamentu Governamentál sira ne’ebé responsável iha área Saude no Edukasaun, atu mellora sira-nia prestasaun servisu iha nível baze hodi garantia katak asisténsia hirak ne’e bele lori impaktu signifikativu no mudansa pozitivu ba iha Labarik Timoroan sira-nia moris.

Embaixadór Korea Súl iha Timor-Leste, Jeong Ho, KIM hatete, akordu ne’ebé selebra, nu’udar onra ida ba Governu Korea Súl, hodi apoiu labarik Timoroan sira-nia saúde no moris-di’ak, liuhusi Projetu Say No to 5S iha Eskola-sira.

"Ba tinan lima oin mai, Ministériu Edukasaun no Ministériu Saúde ho asisténsia husi WFP no WHO, sei fornese pakote saúde, arroz fortificado no edukasaun ba labarik sira. Ho melloramentu nutrisaun no saúde, labarik sira bele mellór kombate doenças infeciosas no dezenvolve sira-nia abilidade aprendijazen, baze ida atu realiza sira-nia potensia”, dehan nia

Reprezentante Rezidente UNDP no ONU iha Timor-Leste, Tuya Altangerel hatete, liuhusi projetu ida-ne’e, sei hala'o serbisu hamutuk hodi mitiga risku moras sira, mánutrisaun labarik, liuhusi fornese Pakote Saúde Primária no Edukasaun Saúde iha eskola-sira.

"Ita mós sei serbisu hamutuk hodi mellora eskola sira ho ambiente ne’ebé saudavel no seguru ba labarik sira atu aprende, inklui fornese merenda eskolar nutritivu no seguru ba labarik feto no labarik mane sira”, dehan nia.

Iha eventu asinatura akordu ne’e, Ministru Rui Gomes akompaña husi Ministru Edukasaun, Juventude no Desportu, Armindo Maia no Vise-Ministra Negósius Estranjeirus no Kooperasaun, Julião da Silva. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items