Ba traballador 71 hirak ne'e, dadauk Sekretáriu Estadu Formasaun Profisionál no Empregu (SEFOPE) liuhusi Diresaun Nasionál Empregu Exteriór (DNEE) ofisialmente hala'o despedida no asina deklarasaun ho traballadór sira-nia família.
Sekretáriu Estadu Formasaun Profisionál no Empregu, Alarico de Rosário husu traballadór sira ba servisu iha Korea Súl la’ós reprezenta pesoál ka Munisípiu, maibé ne’e reprezenta nasaun Repúblika Demakratika Timor-Leste (RDTL).
"Tanbá ne’e ba hó prinsípiu buka osan, nune’e fila mai bele hadi’a ekonomía família no nasaun”, dehan nia iha salaun SEFOPE-DNEE, Bekora, kuarta (12/1).
Pozisaun SEFOPE haree katak kontratu hirak ne'e nu’udar oportunidade ida, atu hatudu komportamentu servisu ne’ebé di’ak, labele ses-an husi sistema, nune’e empregadór husi Korea Súl bele emprega tán joven barak ne’ebé hein hela oportunidade servisu.
Diretór Diresaun Nasionál Empregu Exteriór, Filomeno Soares hatete, deklarasaun ne’ebé SEFOPE liuhusi DNEE asina ho família sira ne'e, nu’udar desizaun ida entre família, atu husik sira-nia oan ka kaben ba servisu iha Korea Súl.
"Karik mosu problema parte rua iha hotu responsabilidade atu rezolve”, dehan nia.
Maske traballadór, hirak ne'e tuir ona teste médiku maibé sira sei kontinua tuir teste PCR covid-19 iha loron 13 janeiru 2022, bainhira hatudu rezultadu negativu, hafoin halo kuarantina durante kalan ida, no iha loron 14 Janeiru 2022 mak aranka ba Korea Súl.
Traballadór hirak ne’e ba área fábrika ema na’in ruanulu-resin-ualu (28), peskas ema na’in-tolunulu (30), no traballadór re-entri ema na’in-sanulu-resin-tolu (13). (*)
