Diretór Servisu Agrikultura Munisípiu Baukau, Moises Lobato Pereira, hatete, natar iha munisípiu Baukau la’os hektar 7.500, maibé liu.
Metas ne’ebé atu reativa natar hektar 7.500 ne’e, orientasaun mai husi Ministériu Agrikultura no Peska (MAP), tanba ne’e, dadaun iha munisípiu Baukau hahú funsiona natar balun ne’ebé antes ne’e, abandona.
"Tarjetu ne'ebé mak nasionál fó mai atu ativu natar tenke atiji to'o hektares rihun 7.500, ha'u garantia Baukau liu, tanba areá abandona lubuk-ida, ita komesa book funsiona hotu ona bee komesa tama hotu ona,"informa nia iha salaun uma dame Uatulele, kuarta (12/01).
Nia afirma, natar sira iha parte Postu Administrativu Laga, Vemase, Baukau Vila, kuaze hektar barak atu funsiona hikas, tanba ne'e konsidera iha époka 2022 posibilidade sei aumenta haree kultivu iha Baukau.
Maibé, MAP liuhusi Servisu Agrikultura Munisípal distribui fini haree ba de'it natar pur-volta hektares-360 tuir demostrasaun área tarjetu, nune’e fini sei la sufisiente.
"Ne'e la to'o, maibé gradualmente ita halo, maluk ne'ebé hetan ona iha tinan-ida ne'e, tinan seluk ita fó fali ba ida ne'ebé seidauk hetan, ha'u hanoin 20 toneladas ne'e oituan, tanba 7,500 hektares ne'e lato'o," afirma nia
Tanba ne'e, atu kobre ba natar hektar 7.500, MAP presiza apoiu fini haree 187,500 toneladas, nune’e sufisiente atu distribui ba natar na'in sira kada hektar hetan kilo-25. (*)
