Xefe grupu HEF, Elda da Costa hatete, lansamentu ba kuda haree mean, metan, fore-rai inklui batar ne'ebé atu hamoris produtu lokál husi baze ba futuru.
"To'os ne'e ektare tolu ho balun, ita kuda produtu fore-rai, haree metan, haree mean, hudi halo kripik no mós batar sele," dehan Elda iha to'os Darasula, segunda (10/01).
Tanba, Governu iha planu povu kuda Governu sosa, nune'e kuda produtu hirak ne'e atu fa'an ba Governu hodi hadia ekonomia iha rai laran.
Grupu ne'e, halo preparasaun hanesan fila rai ho manual de’it, nune'e husu ba Governu liuhusi parte servisu agrikultura Munisípiu Baukau atu apoiu traktor fila rai nian.
"Grupo ne'e mós foin hari'i ne'ebé presiza mós apoiu tekniku, fó formasaun mai ami kona-ba agrikultura nian," nia husu
Nune'e, extensionista Agrikultura Baukau ba Suku Triloka, Niel Pinto hatete, fini ba produsaun hirak ne'ebé mak membru sira kuda, tuir ona kategoria prátika agrikultura dezenvolvimentu (PAD) nian.
"Agora ita uza PAD ona, tantu ba batar, haree, foremungu, forekeli nia modelu ne'e hanesan de'it," nia akresenta
Husu mós ba grupu HEF atu kontinua hakbesik aan ba parte servisu agrikultura Munisípiu Baukau no ajénsia sira iha Baukau hanesan TOMAK, World Vision, inklui CRS atu apoiu treinamentu ba agrililtura modern nian.
Fini produtu ne'ebé grupu sira kuda hanesan haree mean, haree metan apoiu husi Asosiasaun Unidade Feto ba Dezenvolvimentu (AUFD) no fini seluk hanesan batar sele, fore-rai hudi-oan prepara husi grupu rasik.
Membru grupu Haburas Ekonomia ba Futuru (HEF) hamutuk ema na'in-20 ne’ebé mai husi Suku Gariuai no Triloka. (*)