Print this page

PR Lú Olo Promulga Lei OJE 2022 ho Montante Billaun US$2.178

By January 04, 2022 796
Osan dólar Amerika ne’ebé Timor-Leste durante ne’e utiliza hela. Osan dólar Amerika ne’ebé Timor-Leste durante ne’e utiliza hela. Foto Suplay

Tempotimor (Dili)-Prezidente Repúblika (PR), Francisco Guterres 'Lú Olo' pomulga ona lei ba Orsamnetu Jerál Estadu (OJE)  tinan 2022 nian ho montante osan hamutuk billaun US$2.178.328.791.

Tuir Konstituisaun haruka (liuhusi artigu 115, n°1, alínea d) no artigu 145°, n°1), tinan-tinan, Governu mak iha kbi’it atu prepara proposta-Lei refere ba Orsamentu Jerál Estadu (OJE).

Governu hato’o proposta-Lei kona-ba OJE 2022 ba Parlamentu Nasionál iha 15 outubru 2021, ho montante US$1,675.000.000.

Tanba deputadu sira aprova proposta foun liu 100 durante diskusaun espesialidade, Parlamentu Nasionál hato’o Dekretu kona-ba OJE 2022 ba Prezidente Repúblika,  ho montante total liu billaun rua (US$ 2.178.328.791)

"Hafoin tetu klean Dekretu kona-ba Orsamentu Jerál Estadu ba tinan 2022, Prezidente Repúblika, Francisco Guterres Lú Olo, ho kbi’it konstistusionál, promulga Diploma n°55/V ne’ebé dekreta husi Parlamentu Nasionál, iha 16 dezembru liubá", dehan Xefe Kaza Sivil Prezidente Repúblika, Francisco Maria de Vasconcelhos liuhusi Komunikadu Imprensa ne'ebé www.tempotimor.com asesu iha segunda (03/01).  

Ho promulgasaun husi Prezidente Repúblika, lei ne’e tama en-vigor iha loron tuir kedas publikasaun iha Jornál Repúblika, ho efeitu husi 1 janeiru 2022. 

Tama iha Orsamentu Jerál Estadu 2022 reseita no despeza Estadu nian, inklui fundu no servisu autónomu no orsamentu seguransa sosiál. 

Ho orsamentu 2022 ne’ebé promulga ona, Governu tau prioridade nasionál neen hanesan dezenvolvimentu kapitál umanu (edukasaun, formasaun profisionál no saúde),  abitasaun no inkluzaun sosiál, setór produtivu sira (agrikultura no turismu), ambiente no konetividade,

dezenvolvimentu setór privadu, dezenvolvimentu rurál no boa governasaun. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items