Nune’e, tuir planu sei distribui ai-moruk hirak ne’e ba extensionista kada postu Administrativu ne’ebé iha munisípiu Baukau.

Responsavel Krop Servisu Agrikultura Munisípiu Baukau, Leonor de Almeida de Araujo hatete, ai-moruk kanon ba pesti lakataru ne'ebé mak dadaun iha Servisu Agrikultura Munisípiu Baukau hamutuk litru-200, sei fahe ba extensionista sira ida-ida iha Munisípiu Baukau ho litru-8, atu halo prevensaun ba to'os ne'ebé mak identifika ona pesti lakataru atake makas ba batar.

"Ai-moruk kanon mak iha fatin iha 200 liter sei fahe ba kada postu ida sei hetan husi extensionista ida-ida sira mak hatene liu saida mak akontese iha baze,"dehan Leonor, kuarta (29/12).

Maibé, ai-moruk kanon ne'e rasik seidauk sufisiente atu halo atusaun ba pesti ne'ebé atake ona komunidade nia batar iha postu Administrativu-6 hanesan, Baukau Vila, Vemasi, Venilale, Laga, Kelikai no Baguia.

Tanba ne'e, Servisu Agrukultura Baukau nafatin iha mekanismu fó hanoin ba to'os na'in sira atu uza maneira tradisionál hanesan kaur nú, kami, inklui mina hodi kari ba to'os laran nune'e bele hamenus pestisida lakataru ne'ebé iha to'os laran.

"Tarjetu ai-moruk ba pesti lakataru nian mai Munisípiu Baukau pur-volta litru-1000 hanesan ne'e mak foin bele," nia afirma

Pesti lakataru ne'e, mosu uluk iha nasaun Afrika, liuhusi anin to'o iha Nasaun Brazil, tama to'o Kalimantang Indonezia, kontinua afeita liuhusi anin no insetu borboleita tama iha Timor-Leste iha tinan-2019, nune'e iha tinan-2020 espalla iha Timor-Leste to'o ohin loron. (*)