Ministru MTKI, José Lucas hatete, bainhira akontese dezastre naturál iha Bukoli tempu feriadu nune'e parte Ministériu mesmu koordena ona, maibé foin mak bele distribui nesisidade bázika hamutuk ho parseiru hanesan parte hatudu solidaridade ba vitíma dezastre naturál iha Bukoli.

Apoiu ne'ebé fó hanesan espresa solidaridade ba vitíma dezastre naturál, ministériu mós halo kooperasaun ho kompaña jogu liuhusi inspektór jogu ne'ebé hala'o durante tinan barak ona.

"La lori buat barak maibé sasan ne'ebé oituan bele hakma maun-alin sira iha tempu defisil nune'e bele rekopera fali atu ba fali toos, natal, ida-ne'e mak ministériu hamutuk ho parseiru sira mai hakman de’it ita-boot sira-nia tempu defisil," dehan José, tersa (28/12).

MTKI hamutuk ho parseiru kompromete sei kontinua aktividade sosial hanesan ba fatin hotu bainhira mosu dezastre naturál iha teritóriu Timor-Leste.

Nune'e, Xefi Suku Bukoli, Terezinha dos Reis haktuir, to'o ohin loron vitíma dezastre natural Bukoli simu ona matérial rekuperasaun inklui osan mão de obra husi Sekretáriu Estadu Protesaun Sivil (SEPS), nune'e mós Ornagizasaun Noun Govérnamental (ONG), inklui Ministéiru sira ne'ebé fó apoiu nesesidade báziku.

"Buat ne'ebé ema lori mai atu ba festa ruma, atu ba sese de'it laiha, tan ita dezastre iha dia 21 kalan ne'e mak ema lori sasan sira ne'e mai, uituan ga barak ita simu ho liman rua," nia akresenta

Nesesidade báziku ne'ebé MTKI oferese ona ba vitíma dezastre natural mak hanesan fós kg-20, susuben kaixa-ida, sabun kaixa-ida, sampo kaixa-ida, supermi kaixa-ida, mina bimoli litru-2, biskuit kaixa-ida, inklui biti-ida ba xefe família uma ka'in-ida.

Akontesimentu dezastre natural ne’e, iha loron 21 fulan-dezembru tinan 2021. (*)