"Antes atu hetan animál sira ne’e, tenke hetan uluk formasaun ou kapasitasaun ba sira oinsá kuiñesementu hadi'a kapasidade no prosesu haki’ak animal”, dehan Ministru Agrikultura no Peskas (MAP), Pedro dos Reis, hafoin hala'o vizita kortejia ba servisu hakiak Animal iha Sentru Produsaun Animál Dotik iha Postu Administrativu Alas Munisipiu Manufahi, kuarta (22/12).
Dadauk, Diresaun Jerál Pekuaria Veterinaria ninian liuhusi Diresaun Nasionál Pekuaria koopera ona ho servisu agrikultura Munisípiu sira atu fó formasaun kona-ba grupu benefisáriu sira ne’ebé mak hetan ajuda haki'ak animal iha Sentru Produsaun Animál Dotik (SPAD).
Formasaun ne’ebé tuir planu fó ba populasaun sira ne'e sei foku liuba fahi nian, oinsá halo selesaun no jestaun haki'ak no oinsá atu fó kapasitasaun haki'ak fó hahán no protesaun ba animal.
Ministériu Agrikultura no Peskas to'o agora fó ona apoiu animal ba Munisípiu Manufahi ho grupu hamutuk (4) kada grupu ida hetan fahi 4, no iha grupa 4 ne'e fahi hamutuk 16.
Nune'e mós grupu seluk ne’ebé hetan mós ajudu karau hamutuk 10 ba grupo (2), iha grupo 1 hetan karau 5, no grupu sira ne’ebé mak hetan ajudu animal refere sempre tuir formasaun.
Tanba ne'e, formasaun sei hahú fali ho métodu foun, tinan-tinan Ministériu sempre jere fundu transferénsia públiku tantu Grupu privadu ka proposta ne’ebé mak mai husi grupu sira.
Iha oportunidade ne'e, Ministru Agrikultura no Peskas mós entrega sertifikadu ba funsionáriu Ministériu Obras Públika liliu Instituisaun Jestaun Ekipamentu, Institutu Públiku (IJE.ep) ne’ebé mak apoiu ona servisu hodi ateru dalan ba fatin produsaun Animal Dotik. (*)