Diretóra Ezekutivu FUP Baukau, Felismena Belo hatete, apoiu ba idozu ne’e ho hanoin atu selebra festa natal hamutuk ho parseiru servisu no autoridade lokál sira.
"Festeja ida ne'e, ami sei fahe prezente naton hanesan nesesidade báziku ba inan ho aman idozu sira hamutuk na'in-70 ne’ebé husi Suku 8," dehan Felismena ba www.tempotimor.com, kuarta (22/12).
Nia akresenta, apoiu nesesidade báziku ne’e, kada ema ida hetan fós saka-ida ho kilo-20, biskuat falun-2, mina bimoli, susuben, sirup ABC botir-ida, xá, kafé noi masin-midar.
Tuir planu sei fó mós apoiu ba idozu sira iha Postu Administrativu seluk ne’ebé iha Munisípiu Baukau laran, maibé bazeia ba pedidu ne'ebé fundasaun hetan, tanba apoiu nesesidade báziku ne'e, hetan suporta husi Friendshop Baukau.
Nune'e, benefisiária, Joaña Belo sente kontente no agradese, tanba bele hetan apoiu nesesidade báziku husi FUP Baukau ne’ebé bele auguenta ba loron balun.
Idozu sira ne'ebé benefisiáriu ba apoiu nesesidade báziku ne’e, kompostu husi Suku Letemumo, Kaluliu, Abo, Bualale, Baguia, Waitame, Abafala no Makalaku. (*)
