Tempotimor (Dili) – Prezidente Kámara Komérsiu Indústria Timor-Leste (CCI-TL), Oscar Lima husu emprezariu foun sira atu haka'as an, hodi bele sai emprezariu ne'ebé di'ak iha futuru.

"Ohin ita nia emprezariu foun. Ema ne'ebé hakarak sai emprezariu. Sira hakarak hakiak manu broiler. Ema kuaze 40. Sira nia background la'ós ema emprezáriu. Sira hamutuk ho Movimentu Asosiasaun Ekonomia Komunitariu (MAEKOM), ne'ebé durante ne'e hala'o atividade ne'e," hatete Oscar Lima iha nia edifisiu AKAIT, Dili, Sesta (13/09/19).

Prezidente CCI-TL ne'e, fó parabens ba emprezariu foun sira hodi nune'e sira bele ho vontade ho servisu.

Iha fatin hanesan, Rui Castro Diretór MAEKOM ne'ebé durante ne'e tuir hela konferensia internasionál kona-ba hakiak manu broiler hatete MAEKOM hamutuk ho CCI-TL hala'o workshop ida kona-ba hakiak manu broiler.

“Oradór iha workshop ne'e mai husi Indonézia, ne'ebé mai fó workshop ba na'in 40 ne'ebé servisu iha manu luhan, para sora bele kompriende di'ak liután oinsá hakiak manu," dehan Rui Castro.

Kona-ba MAEKOM, tuir Rui Castro ninia sanak ka filiál iha ona munisipiu 9, ne'ebé kada fulan kapasita nafatin sira-nia abilidade hakiak manu broiler, ne'ebé bele tama iha luhan hamutuk 123.000. “Entaun, tuir ha'u nia estimasaun to'o iha Dezembru bele sa'e to'o 200.00 manu," dehan Rui.

Entretantu, MAEKOM rasik nia planu ba oin, katak iha tinan 2020 produtu MAEKOM sei okupa merkadu ho pursentu 20.

"Tuir planu estratejiku ne'ebé ami dezenvolve hela, iha 2020 MAEKOM sei okupa pursentu 20 no tinan 2021 sa'e ba pursentu 40 no sa'e ba 2022-2023 tenke sa'e ba pursentu 60 mak okupa iha merkadu nasionál, husi produtu MAEKOM nian hanesan manu broiler," nia esplika.