Sekrétariu Jerál Konsellu Vetéranu Munisípiu Baukau, Manuel da Costa Soares hatete, benefisiáriu hamutuk 43 ne'e, kompostu husi Suku 4, hanesan Suku Bahu, Tirilolo, Kaibada inklui Suku Buruma.
Enkuantu nesesidade báziku ne'ebé benefisiariu kada família sira hetan mak, fós saka-2, mina bimoli, Manu-tolun, rinso, sabaun, inklui kulisaun.
"Apoiu ne'e mai husi veteranus Australia, veteranu Timor-Leste hanesan implementa, família kbi'it la'ek 43 ne'e mak hetan apoiu nesesidade báziku husi Veteranu Australia liuhusi veteranu Timor-Leste", dehan Manuel, sabadu (18/12).
Alende husi apoiu nesesidade báziku ne’e, konstrui mós uma rua ba família kbi'it la'ek iha Aldeia Ro-ulu, Suku Bauhu, Postu Administrativu Baukau Vila.
"Uma ne'ebé previstu ne'e iha uma tolu, maibé katuas atu hetan uma ida mate tiha, ne'ebé ohin halo hela família rua nian", nia hatete
Nune'e, benefisiaria ba uma iha Suku Bahu, Juliana da Costa sente kontente, tanba bele hetan ona uma foun husi veteranus Australia.
Xefe Aldeia Ro-ulu Suku Bahu, José Henrique da Costa Belo afirma, família kbi'it la'ek rua ne'ebé hetan uma foun husi veteranus Australia ne'e, naran tama ona iha lista projetu Uma Kbi'it La'ek (UKL).
"Maibé, ami agradese wa'in ba veteranu Nasionál no Munisípal ne'ebé mak fó ona ajuda ba ami nia inan faluk no kbi'it la'ek sira, tanba durante ne'e sira hela iha uma talin la dignu”, katak Xefe Aldeia
Verifikasaun dadus família kbi'it la'ek iha Munisípiu Baukau husi ékipa nasionál hamutuk ho Konsellu veteranu Munisípiu Baukau hala’o ona durante loron 4 nia laran. (*)