Print this page

TLTC Aileu-Ermera Gradua Estudante 21 iha Mantane

By December 20, 2021 597

Tempotimor (Aileu)-Filiál Timor-Leste Training Center (TLTC) husi Munisípiu Aileu, no Ermera konsege Gradua estudante hamutuk na’in-21 iha Departamentu Ortikultura, Língua Inglés no Administrasaun Finansas.

"Ohin ita fó graduasaun ba 21 husi Filiál Munisípiu Ermera no Aileu husi departamentu tolu, mak Inglés, Ortikultura, no Administrasaun Finansas ne'ebé mak tama Gradua ba sira iha Mantane ne'e”, dehan Diretór Nasionál Timor-Leste Training Center (TLTC), Leopoldino Vasco Martins, iha Sede Suku Fahiria, Postu Administrativu Aileu Vila, Munisípiu Aileu, segunda (20/12).

Formasaun durante fulan neen (6), ne'ebé hala'o estudu teoria no prátika fulan tolu (3), inklui mós estájiu fulan tolu (3).

Formadór ba kursu Ortikultura Filial Munisípiu Aileu, Valentino Maia Gusmão gatante formandu sira prontu kompete iha kampu servisu sira.

"Ba ha'u-nia firmandu ne'ebé mak ha'u fahe ha'u-nia esperiénsia ba, ha'u garantia tiha ona, hanesan ita-nia moto ne'ebé ita hakerek, la'ós de'it iha Munisípiu Aileu maibé sira mós kompete kampu de traballu sira, nomós sira bele servisu ba sira-nia an, sira aprende durante fulan neen (6)”, afirma nia.

Moto ne'ebé TLTC hakerek iha Graduasaun ne’e, TLTC prontu kompete iha mundu traballu, kria kampu servisu ba an rasik, no kontribui ba dezenvolvimentu Nasionál.

Diretór Sekretária Estadu Formasaun Profesionál no Empregu (SEFOPE) Munisípiu Aileu, Jacinto da Costa Soares, apresia formandu tanba bele hasa'e volume produsaun iha área ortikulta sira-nian.

"SEFOPE ohin mai partisipa iha graduasaun ida ne'e, apresia boot tebes tanba Aileu no Ermera fatin ida ne'ebé mak potensiál tebetebes ba ortikultura, la'ós ne'e de'it maibé mós ho língua Inglés”, dehan Jacinto. 

Tanba Munisípiu Aileu no Ermera identifika sai potensiál ba ortikultura tanba komunidade maioria mak kuda modo no ai-horis. (*)

Rate this item
(0 votes)
Last modified on Monday, 20 December 2021 15:06
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items