"Ami sujere ba parte relevante iha diresaun komersiu nian atu haree buat hotu, tanba konsumidores sira bele uza nesesidade báziku, neutraliza situasaun sira ne’e atu sasan folin labele makas", dehan Bernardo, tersa (14/12).
Nia dehan, sasan báziku ne’ebé folin sa’e hahú husi distribuitór sira husi Dili, impaktu to’o Baukau, tanba ho razaun besik tempu natal no tinan foun kustu kontainer sa'e.
Tanba, Mina litru 5 Dos ida ne'ebé antes ho folin US$16.00 dollar agora sa’e ba US$28.00 nune'e fa'an jerken ida US$7,50 sentavus, fós 24 kilograma ne'ebé antes folin US$11,50 sentavus agora sa’e ba US$13.00 no kilograma 30 folin sa'e ba US$16.50 sentavus, no mantolun uluk rak ida folin US$4.00 agora sa'e ba US$6.50 sentavus.
"Importante mak bele neutraliza situasaun ne'e tuir ekonomia, tanba dezempregu barak, liuliu kontrola iha sentral Dili. Presija interven hosi governu nune'e sasan nesesidade báziku ne'ebé konsume iha tempu inportante pelumenus neutral", Bernardo informa
Konsumedores, Teresa Maria Freitas nu'udar agrikultor senti triste ho folin sasan nesesidade báziku ne'ebé hahú sa’e, nune'e husu governu atu neutraliza.
Tanba ne'e, Diretór Servisu Diresaun MTKI Baukau, Sabino dos Santos rekuiñese dadaun folin sasan liuliu nesesidade baziku sa’e iha Munisípiu Baukau, tanba besik selebrasaun loron boot natal no tinan foun.
Nune'e, nia parte sei hato'o prekupasaun hirak ne'e bainhira enkontru ho parte diresaun nasionál inklui Sentru Lójistika Nasionál (CLN, sigla portugés) atu halo intervensaun ba folin sasan iha merkadu. (*)
