Iha abertura formasaun ne'e SEKOOP husu ba formandu sira, atu aproveita di'ak oportunidade ne'ebé mak oferese.
“Formasaun ne’e metodu ida, atu ita aprende, oinsá atubele aktualiza ita-nia matenek, hodi kontribui ba kualifikasaun rekursu umanu nian. Iha vida formasaun ne’e, atu asegura rekursu umanu depende ba formadór no formandu sira”, dehan Elizário Ferreira iha Salaun Sentru Treinamentu Vokasionál Juventude (STVJ) Komoro, segunda (13/12).
Formandu sira ne'e mai husi SEKOOP ne’ebé mak tuir formasaun hamutuk ema na’in-18, kompostu husi mestradu hamutuk na’in-6, no lisensiatura hamutuk ema na’in-12.
Formasaun ne’e rasik fahe bloku ba tolu, bloku dahuluk hahú husi 13-17 dezembru 2021, no bloku daruak ho datoluk sei realiza iha inísiu fulan-janeiru tinan 2022.
Diretora Institutu Nasionál Dezenvolvementu de Mão de Obra (INDIMO), Isabel Fernandes de Lima hatete, instituisaun reguladora ne'ebé regula sentru formasaun sira ne'ebé iha Timor laran tomak.
"Instituto Nacional de Dezenvolvementu de Mão de Obra ne'ebé mak regula sentru formasaun hothotu iha Timor-Leste, tantu ita iha sentru formasaun estatál, e nomós sentru privadu sira”, nia informa.
Maibé husu ba formandu sira ne'ebé mak hetan Sertifikadu nível III no IV mós sei bele haforsa ensinu tékniku Vokasionál sira.
Nune'e Diretór STVJ, Norberto da Costa agradese ba, konfiansa ne'ebé Instituto Nacional de Dezenvolvementu de Mão de Obra no Sekretáriu Estadu Kooperativa fó ba STVJ.
"Primeiru hakarak hato'o agradese mós ba parte INDIMO no mós Sekretária Estadu Kooperativa (SEKOOP) nian, ne'ebé fó fiar ba STVJ atubele fahe buat ne'ebé mak ami iha nu'udar formadór”,
hatete nia.
Sentru Treinamentu Vokasionál Juventude Komoro hetan ona akreditasaun husi Instituto Nacional de Dezenvolvementu de Mão de Obra (INDIMO). (*)