Print this page

SSSI-WVTL Selebra Loron Mundiál Difisensia Iha Baukau

By December 11, 2021 696
Ema ho difisiensia ne'ebé partisipa hela serenomia selebrasaun loron mundiál ba ema ho difisiensia iha uma dame Uatele Baukau, sesta (10/12). Ema ho difisiensia ne'ebé partisipa hela serenomia selebrasaun loron mundiál ba ema ho difisiensia iha uma dame Uatele Baukau, sesta (10/12). Foto Tomas Freitas

Tempotimor (Baukau)-Sentru Solidariedade Sosiál no Inkluzaun (SSSI) Munisípiu Baukau servisu hamutuk ho World Vision Timor-Leste (WVTL) selebra loron mundiál ba ema ho difisiensia iha Munisípiu Baukau.

Diretór Sentru Solidariedade Sosiál Munisípiu Baukau, Guido Ricardo Belo hatete, lolós selebrasaun ema ho difisiensia iha loron-3 fulan-dezembru tinan 2021, maibé ligadu preukupasaun balun, nune'e selebra fali iha loron-10 fulan-dezembru 2021.

"Ne'e koperasaun world vision no sentru solidariedade sosiál Baukau atu nafatin fó mensajen ba iha públiku ema hotu entaun hotu-hotu hola parte tantu ema sira ho difisiensia ho tipu oi-oin", dehan, sesta (10/12).

Nia dehan, tema ne'ebé uza iha loron selebrasaun ema ho difisiensia inkluzividade no sustentabilidade ne'ebé hola parte husi sosiadade sivil sira ne'ebé tau matan ba ema ho difisiensia atu garante ema ho difisiensia ba prosesu dezenvolvimentu.

Nune’e, Ministéiru Solidariedade Sosial no Inkluzaun atu haree promosaun no protesaun ba ema ho difisiensia ba Governu bele promove inkluzividade garate sustentabilidade dezenvolvimentu ba ema ho difisiensia.

"Iha ne'e ita parseiria ho World Vision servisu makas hamutuk ho sentru no mós katilosa rasik haree aktividade tarjetu ne'e world vision, mais sentru solidariedade sosiál haree área kobertura iha postu-6 ne'e hotu", hatete nia

Tanba, rekursu menus, nune'e sentru solidariedade sosiál Munisípiu Baukau nakloke aan ba parte World Vision, Katilosa inklui Asosiasaun Difisiente Timor-Leste (ADTL) haree ba investimentu área prioridade ne'ebé ema ho difisiensia presiza atu dezenvolve kapasidade no abilidade.

Dadaun ema ho difisiensia matan tuir formasaun durante fulan-3 hodi aprende hakerek lee uza letra braim ho kapasidade ne'ebé iha atu asesu iha merkadu traballu atu halo bens estar ba sira nia família.

Ema ho difisiensia ne'ebé tuir formasaun iha Munisípiu Baukau durante fulan-3 ne’e kompostu husi Munisípiu Ermera, Vikeke, Lautém inklui Buakau.

"Espera katak janeiru mai sira hotu kontinuasaun área aktividade seluk", nia informa

Nune'e, Eliza Maria da Costa hanesan responsabilidade ba Organizasaun Ra'es Hadomi Timor-Oan (RTHO) ba ema ho difisiensia Baukau hatete, selebrasaun loron mundiál ne’e, difisiensia partisipa hotu no sima mós kontente.

"Ohin ita nia maluk sira ema ho difisiensia hotu-hotu mai partisipa, sira mós kontente tebes, ba sira nia loron difisiensia ida ne'e", katak eliza

Selebrasaun loron mundiál ne'e, atu loke sira nia hanoin katak, ema ho difisiensia ne’ebé iha talent bele mós promove iha futuru.

"Tanba dala barak maluk ema ho difisiensia sei hetan diskriminasaun makas husi familia rasik, tanba ne'e família sira ne'ebé partisipa bele dehan, ita nia oan ne'ebé difisensia mós bele", nia hatete

Dala barak mós família rasik halo diskriminasaun ba sira nia oan rasik, hanesan ida ne'ebé la'os difisiente haruka ba eskola, maibé sira ne'ebé difisente dala ruma sulan de'it iha uma.

Bainhira remata selebrasaun loron mundiál ba ema ho difisiensia, world vision mós fahe nesesidade bazika ba sira.

Dadus ne'ebé Organizasaun RTHO rejistu ba ema ho difisiensia iha Munisípiu Baukau tuir área tarjetu World Vision nian totál hamutuk ema na'in-500.

Entertantu, partisipa iha loron selebrasaun mundiál ba ema ho difisiensia nian husi postu admistrativu Vemase, Kelikai inklui Baukau Vila, ne’ebé ho totál hamutuk na'in-50. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items