"Proposta 45 ba saúde pasa", dehan Prezidente Parlamentu Nasionál, Aniceto Longuinhos Guterres Lopes, iha depabate espesialidade OJE 2022 iha plenária, Parlamentu Nasional, kinta (09/12).

Ministra Saúde, Odete Maria Freitas Belo hatete, proposta 45 ba klínika Bairopite ne'ebé ho montante US$258,110 atu aloka ba audisional hahán, tratamentu ba pasiénte sira nomós ba sira-nia jestaun ba rekursu umanu ne'ebé sira selu durante ne'e.

"Em prisimpiu laiha rezersaun ba proposta ida ne'e, tanba prontu nia orsamentu ne'e la fó impaktu ba iha tetu orsamentu Governu nian", esplika nia.

Enkuantu iha proposta 45 ho títlu proposta dotasaun Governu kona-ba programa 983 investimentu divertifikasaun ekonómika, dotasaun inisiál kategória US$2,500,000, hasai tiha alterasaun US$258,110 no dotasaun finál US$52,241,890.

Tanba ne’e, tau fali ba Ministériu Saúde programa 805 kona-ba dotasaun inisiál kategória US$10,998,800 aumenta alterasuan US$258,110 no dotasaun finál kategória US$11,256,910.

Nune'e dotasaun inisiál totál kategória despeza US$10,998,800 no dotasaun finál kategória despeza US$11,256,910.

Proposta ne'e hato'o husi deputadu proponente, Mariano ‘Assanami’ Sabino, tanba Klínika Bairopite fó ona nia kontribuisaun ida ne'ebé di'ak no kualidade tebes durante ne'e hodi halo atensaun ba populasaun Timor-Leste, ne'ebé presiza tebes asistensia médiku liliu inan isin-rua ne'ebé presiza atendementu ba partu nian, moras kankru sira ne'ebé presiza halo atendementu intensivu, pasiente ne'ebé presiza baixa hodi halo kontrolu ida efisiénsia no rigorozu no seluk tan.

Maibé durante ne'e difísil tebes ba rekursu orsamentu atubele ba nesidade, tanba ne'e bankada Demokrátiku propoin orsamentu audisionál ho montante US$258,110 ne'ebé atu aloka ba nesesidade atendementu má-nutrisaun no alimentasaun ba pasiénte sira ho montante US$85,600.

Ba nesesidade atendementu ba materna infantil, farmasia no kankru rán ho montante US$49.560 no ba nesesidade atendementu funsionamentu klínika no reforsa institusaun ho montante US$122,950. (*)