Print this page

CNRT 'Hakilar' Membru Governu Laiha Kapasidade Ezekuta OJE

By December 04, 2021 1293
Deputada CNRT, Virgínia Ana Belo. Deputada CNRT, Virgínia Ana Belo. Foto Suplay

Tempotimor (Dili)-Bankada Congresso Nacional de Reconstrução de Timor (CNRT) iha Parlamentu Nasionál (PN) hakilar membru Governu laiha kapasidade atu ezekuta Orsamentu Jerál Estadu (OJE) hodi sustenta ba moris povu.

"CNRT haree kapasidade ezekusaun orsamentu 2021 husi Governu de Faktu ida ne’e mukit teb-tebes, atu remata ona Ano Fiskál, ezekusaun foin atinje pursentu 57 ka US$1,156 mil millaun husi totál orsamentu US$2,030.3 mil millaun”, deklara Deputada CNRT, Virgínia Ana Belo, iha PN, sesta (03/12).

Tanba dezde elaborasaun OJE 2020, Governu mai Parlamentu Nasionál aprezenta, orsamentu aloka bazeia ba programa, no dehan programa mak determina tetu fiskal hodi asegura kualidade orsamentu nian.

Maibé enfelismente programa iha área infraestrutura la-la’o, programa ida ne’ebé tuir loloos bele fó iis foun atu absorve kampu traballu inklui habit metin setór privadu.

Tanba husu Primeiru Ministru, Taur Matan Ruak,

atu aprezenta uluk relatóriu ezekusaun programa, orsamentu no ninia impaktu ba povu kada ministériu no instituisaun Estadu sira, atu nune’e, deputadu sira bele diskute didi'ak no tetu ho kuidadu ba proposta OJE 2022 ida-ne’e.

"Maske ita hotu hatene katak Timor-Leste nia ekonomia depende ba despeza públiku iha OJE. Maibé Governu nia kapasidade ezekusaun ne’ebé mukit halo ekonomia iha rai laran hakdasak liután”, dehan nia.

Dadauk Timot-Leste tama ona fulan-dezembru 2021 ne’ebé besik remata ona, ezekusaun foin atinje 57% ka billaun US$1,156 husi totál orsamentu billaun US$2,030.3 no kuaze metade mak Governu labele ezekuta no sei filafali ba kofre Estadu.

Purtantu dadus ezekusaun OJE 2021 ne’ebé haktuir iha Portal Transparénsia hatudu ezekusaun kiik-liu ka menuz husi 20% to’o inísiu fulan-fezembru 2021 mak orsamentu ho kategória Kapitál Dezenvolvimentu, ezekusaun foin atinje pursentu 14 ka US$54.3 millaun husi totál despeza US$396.4 millaun.

Aleinde orsamentu ba Autoridade RAEOA nian ho totál US$97.76 millaun, foin mak ezekuta pursentu 18, ka reprezenta US$17 millaun.

Nune'e mós orsamentu ba Fundu Covid-19 foin atinje pursentu 49.5 (US$130,1 millaun) husi totál fundu US$287,6 millaun. Enkuantu Ezekusaun fundu covid-19 kontinua mínimu tanba kompaña barak Governu seidauk selu, liliu empreza fornesidór, cathering, otel, fontline ba jestaun Covid-19 barak mak seidauk simu pagamentu. (*)

Rate this item
(1 Vote)
Last modified on Saturday, 04 December 2021 18:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items