Diretór Jerál Sekretáriu Estadu Kooperativa (SEKoop), Francisco Xavier dadaun ne'e SEKoop kria ona komisaun ba preparasaun hodi komemora loron direitu Sosiul-Ekonómiku iha Lautein

"Dia 10 ita sei komemora loron dia direitu sosiu-ekonómiku ba merkadu iha Munisípiu Lautein, ita-nia preparasaun kria ona komisaun para komisaun sira halo servisu ba atividade hirak ne'e”, dehan Francisco Xavier ba www.tempotimor.com iha nia kna’ar fatin Akait, Dili, kinta (02/12)

Maske Sekretária Estadu Kooperativa seidauk deside loron nasionál ba komemora loron direitu sosiu-ekonómiku maibé dadaun ne'e Komisaun deside  loron 10 fulan-dezembru hodi hala'o komemorasaun ne’e.

Atividade ne'e nia objetivu sei esplika klean ba membru kooperativa nian relasiona ho direitu ba sosiu-ekonómiku ba merkadu nian.

Alende ne'e, mós sei halo retiru avaliasaun ba SEKoop nia hodi halo avaliasaun ba atividade durante tinan 2021 nia laran.

"Retiru nasionál atividade Sekretáriu Estadu ninian no mós ba kooperativa sira iha territóriu Timór laran tomak, tanba atividade avaliasaun ne'e importante durante tinan 2021 mak atendimentu SEKoop ba komunidade no kooperativa sira karik”,  esplika nia.

Nune'e mós iha dezafiu ruma ne'ebé hasoru kooperativa no Sekretária Estadu Kooperativa hamutuk atu tau ideia ho halo servisu di'ak liután iha tinan 2022.

Hahú iha loron 7 fulan-novembru sei hala'o avaliasaun atividade internál SEKoop nian, no depois loron 8-9 Sekretária Estadu Kooperativa halo retiru hamutuk ho kooperativa sira no iha loron 10 mak sei halo komemorasaun loron Direitu Sosiu-ekonómiku ba merkadu.

"Ida ne'e ita hein prosesu ne'e la'o e depois ita sei tur hamutuk liliu ba dirijente sira nomós ba Kooperativa sira atu nune'e ita bele deside loron aban bairua ba kooperativa ninian maibé ita sementara (provizóriamente) ne'e seidauk deside”, afirma nia.

Partisipante atividade sira ne'e sira mai husi Autoridade lokál iha Munisípiu Lautein nível Munisípiu to'o suku. (*)