"Ha'u fó parabéns no apresiasaun ba Telkomcel, tanba lori aplikasaun my loja ida ne'e, mai iha Timor hodi hamosu aplikasaun ida inovasaun mai komunidade timorense, ne'e sei fasilita tebes ita-nia modo na’in sira iha rai klaran, ita-nia fatin turizmu hothotu, iha parte industria ninian, industria pequena, media, empreza sira", dehan Ministru Turizmu Komersiu no Industria, José Locas do Carmo, iha Suai Room Timor Plaza, kuarta (01/12).
Tanba ne'e, Governu marka inisia foun ida katak, ba oin Governu sei hamutuk ho telkomcel, oinsá hanoin atu servisu hamutuk fasilita komunidade sira.
Hanesan iha Maubisse no Aileu modo dodok de'it, oinsá Governu servisu hamutuk ho maluk produtu ki’ik empreza sira-nian inovasaun bele kanaliza liuhusi my loja.
"Ida ne'e inisiativa ida ne'ebé ba oin ministériu hakarak atu iha diskusaun klean liu, intensivu liu lideransa telkomcel ho nia ekipa tomak, para oinsá ita hamutuk fornese oportunidade ida ne'e ba komunidade timorense ne'ebé presiza tebes liliu setór produtivu hanesan setór produtivu ne'ebé ita-nia Agrikutór, peskas, pekuaria, turizmu no industria kiik sira", hatete nia.
Maibé husu ba telkomcel atu iha nafatin kooperasaun, komunikasaun ho ministériu turizmu komersiu industria, tanba iha ministériu refere iha diresaun nasional ida haree kona-ba pretesaun konsumidór.
"Ita nafatin iha enkuadramentu legal ka kobertura legal di'ak ba aplikasaun ida ne'e, atu proteje ita-nia kliente sira husu para nafatin iha koordenasaun di'ak entre telkomcel ho ministériu turizmu komersiu industria", afirma nia.
CEO Telkomcel, Yogi Rizkian Bahar hatete, telkomcel hamosu aplikasi My loja hanesan teknolojia dijital, tanba hakarak dezenvolve liután ekonomia iha Timor-Leste.
“Bainhira ita hare iha estrada ibun, negosiante barak loos mak fa’an sasán, ne’e faze ida ne’ebé Timoroan sira konsege fa’an, maibé sira presiza atu haluan tan sira-nia merkadu, entaun agora dadauk ne’e Telkomcel hamosu ona aplikasaun my loja teknolojia dijital", esplika nia.
Tanba my loja ne’e hanesan tokopedia ne'ebé uza hodi halo kompras ba sasán liuhusi merkadu online mak my loja, iha aplikasi ne’e la’ós de’it operadór Telkomcel mak uza maibé Telemor no Timor Telecom mós bele uza hotu importante mak install aplikasi my loja.
Nune'e, telkomcel rasik sei halo sosializasaun durante fulan ida hodi halo advokasia, kona-ba oinsá kliente utiliza aplikasaun my loja no agora pursentu 80, mak utiliza ona aplikasaun ne’e hodi fa’an no sosa sasán. (*)