"Ida ne'e regula iha lei, bainhira mak atubele foti sasán estadu nian fó ajuda ba vitima dezastre sira”, dehan nia iha PN, kinta (25/11).

Tanba Governu liuhusi protesaun sivíl ninia papel ne'e wainhira akontese dezastre ruma mak foin bele fó (hahán no la'òs hahán) atubele ajuda sira ho temporária.

Bainhira Governu ajuda ona sira hela iha kost, ida ne'e sira mak tenke ba servisu, hodi buka rasik hahán, para labele depende de'it ba hahán husi Governu.

Haree ba kost temporária ne'e Governu esforsu kontinua hala'o aproximasaun ho vítima sira, karik sira ne'ebé mak prontu atu fila ba sira-nia munisípiu, mesmu labele ona atu hari’i sira-nia uma iha fatin rejistu, maibé protesaun sivíl iha ninia material atubele apoiu.

Tanba ne'e, prosesu tomak agora la'o hela no espera katak fulan tolu hanesan ne'e bele finaliza ona, atu sira bele iha fatin hotu ona.

Iha ne'e, Sekretáriu Estadu Protesaun Sivíl laiha kompetensia kona-ba planu hari’i bairo foun ba vitima sira tanba protesaun sivíl apoiu depois de akontese dezastre, oinsá mak halo rekuperasaun ba vitima sira, nomós lori fali sira ba hela iha fatin seguru.

Tanba atu hari’i bairo foun ne'e kompetensia husi Ministériu Planu Ordenamentu, no Ministériu Justisa, atu identifika rai, nomós Ministériu Edukasaun Juventude no Desportu (MEJD) atubele hari’i eskola, inklui bee no saneamentu, ida ne'e sei sai komplikadu liután.

"Tanba ne'e mak atu ko’alia kona-ba hari’i bairo foun, ida ne'e laiha ona kompetensia protesaun sivíl”, afirma nia.

Dadauk vítima hamutuk 48 mak Autoridade Munisípiu Dili ho Sekretáriu Estadu Protesaun Sivíl konsege lalin sira ba hela kost ho temporariamente iha Díli laran.

Enkuantu vitima refuziadu balun ne’ebé sei hela fatin refuziadu hanesan Dom Bosco iha família 25, inklui balun iha Restaurante Vitòria Bidau. (*)