Print this page

ANC Atribui Call-Sign ho MMSI ba Ró Berlin-Nakroma

By November 25, 2021 639
Ministru Transporte no Komunikasau, José Agostinho da Silva (los), entrega hela sertifikadu Call-Sign ho MMSI ba Prezidente DNTM, Lino Barreto, iha salaun MTK, Kaikoli, kinta (25/11). Ministru Transporte no Komunikasau, José Agostinho da Silva (los), entrega hela sertifikadu Call-Sign ho MMSI ba Prezidente DNTM, Lino Barreto, iha salaun MTK, Kaikoli, kinta (25/11). Foto Tempo Timor

Tempotimor (Dili)-Ministériu Transporte Komunikasaun (MTK) liuhusi Autóridade Nasionál Komunikasaun (ANC) ofisiálmente atribui Sertifikadu Call-Sign (Kódigu) ho identidade Maritime Mobile Service Identity (MMSI) ba Ró Berlin-Nakroma.

"Durante ne'e Ró Nakroma la'o ho sistema komunikasaun ou ita bele dehan la'o ho Bandeira nasaun Indonézia ninia, ho nune'e eventu dadersan ida ne'e mak atribui Sertifikadu Call-Sign ho MMSI ba Berlin -Nakroma, atribuisaun ida ne'e dahuluk ba Ró nasionál iha Timor-Leste nu'udar nasaun soberania ida, tanba númeru komunikasaun  ne'ebé mak rezista ba Ró Nakroma to’o mai dia 12 de Outubru 2021 ne'e númeru husi nasaun Indonézia”, dehan Prezidente ANC, João Olivio Freitas, iha Salaun MTK, kinta (25/11).

Entaun ANC nu'udar ajensia reguladór ida, halo esforsu ho apoia tomak husi MTK ho kooperasaun di'ak husi diresaun nasionál Transporte maritima (DNTM) estabiliza prosedimentu internu ida ba atribuisaun Call-Sign ho MMSI hodi asegura di'ak liután soberania Timor-Leste nia iha parte komunikasaun tasi/marítima nia.

Ho nune'e ANC prosesa ona administrativu ida ba rejistrasaun Berlin-Nakroma iha sistema baze de dadus mundiál, hodi troka no hasai Bandeira Indonézia no tau hikas Bandeira RDTL, iha sistema rádiu-komunikasaun nia, iha ne'ebé Timor-Leste mak hanesan na’in ba Ró refere.

Nune'e Call-Sign (Kódigu) foun ne'ebé atribuidu ba Berlin-Nakroma mak 4WBN2, no MMSI mak 555011111.

Entretantu Call Sign hanesan sinal indikativu samada internasional ne'ebé formalmente emite husi ajensia telekomunikasaun Govemu nian hodi sai hanesan kódigu chamada tuir númeru nasaun idak-idak ne’ebé atribui husi Internasionál Telekomunikasaun Unit/ITU, hodi fasilita komunikasaun ba transportes marítimu.

MMSI (Maritime Mobile Service Identity,) hanesa númeru kontaktu identidade úniku ne’ebé dijitalmente liga hodi identifika eskluzivamente ba estasaun radius, estasaun kosteira no bele kontaktu liuhusi telefone no telex hodi bele konekta ho rede públiku telekomunikasaun hodi halo chamada outomatika, ho nune'e bele fasilita komunikasaun liuhusi AIS (Automatic Identification System).

Ho nune'e fasil atu detekta asidente no bele fasilita konfirma pozisaun Ró-ahi iha fatin ne’ebé de’it iha tasi laran.

Prezidente DNTM, Lino Barreto afirma, marka tan pontu importante ida no pela primeira vez Governu Timor-Leste liuhusi MTK atribui sertofikadu balun ba Ró-ahi Berlin-Nakroma.

"Ne'e ba primeiravez no ida ne'e orgullu boot ba ita-nia Oitavu Governu konstitusionál nia mandatu, tanba ita bele marka tan istória di'ak ida”, afirma nia. (*)

 

Rate this item
(0 votes)
Last modified on Thursday, 25 November 2021 15:49
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items