"Ita ko'alia investidor la'ós ko'alia keos, ne'ebé keós nia ba ohin ba fila kedas, investidor ne'e ema sira iha osan, sira iha rede internasionál atu foti desizaun, ne'ebé ha'u fiar katak ita lalika pesimista importante ita otimista, tanba investimentu ita labele hanoin de'it osan, investimentu ba reputasaun mós investimentu ida, informasaun ne'ebé ita fó sai mós investimentu ida, ema koñese ita mós invetimentu ida", dehan nia hafoin hasoru malu ho PR Lú Olo iha Palasíu Prezidensiál Bairopite, tersa (23/11).
Siklus investimentu ida ne'e mak halo hela iha partisipasaun Timor-Leste iha expo sira iha rai liur hodi fa’an imajen Timor-Leste bele sai vizivel liu no marketevel liu iha liur.
"Ha'u dehan ne'e la'ós keós ne'ebé ha'u bolu nia mai ikus mai garante, ita ko'alia investimentu ne'e ha'u tau, presiza períodu ida para hetan nia rezultadu", hatete nia.
Tanba fiar katak kualker promosaun ne'ebé halo iha liur ho naran expo, ho naran saida de'it, objetivu importante mak lori ema koñese Timor-Leste, koñese potensia ne'ebé iha halo investimentu, halo negosiu ida ne'e mak atubele halo ekonomia ne'e buras.
"Expo ita lori, ita-nia formasaun kona-ba potensialidade saida mak rai ida, nasaun ida iha, ita tau iha pavilaun ne'ebé mak expo Dubai fó mai ita", esplika nia.
Investidór sira bele mai iha Timor-Leste maibé investidór sira mós iha sira-nia maneira rasik atu cross check, verifika informsaun sira ne'ebé fó, nune'e sira foti desizaun business.
"Ita bele iha inkontru maibé desizaun atu investimentu ne'e prosesu ida tan, tanba ne'e la'ós ohin ita hasoru malu aban prosesu kedas, sira sei haree", afirma nia.
Enkuantu Timor-Leste iha kondisaun lubuk ida maske iha potensia kafé maibé mós tenke iha infraestrutura seluk atu apoiu investimentu ida ba plantasaun kafé, nomós investimentu ba fa’an kafé nian.
"Iha situasaun ida ne'e sira mós presiza tempu atubele foti desizaun, informasaun ita fó iha expo buat ketak ida, informasaun cross check husi ita-nia ajensia sira ne'ebé iha hanesan Trade Invest no iha ministériu sira seluk ne'ebé iha relasaun ho setór produtivu sira, informaun sira ne'e sira tenke cross check atu nune'e sira bele foti desizaun", esplika nia. (*)