Diretór Departamentu Tránzitu PNTL Munisípiu Dili, Inspetór Domingos Sarmento Gama hatete, PNTL garantia tinan ne'e, hatama reseita ba kofre Estadu husi atividade pasa revista.

"Ha'u garantia ho kondisaun mínima, mais ha'u garantia katak tinan ida ne'e ita bele hatama 250 mil ba iha kofre estadu”, dehan Inspetór Domingos Sarmento, iha Kaikoli, segunda (22/11).

Tanba iha semana kotuk Polísia Tránzitu Nasionál hatama osan bá kofre eEtadu hamutuk rihun US$2.924 inklui prende evidénsia hanesan karreta no motorizada hamutuk sanolu-resin-lima(15).

"Iha parte infrasaun, iha semana kotuk ne'e, ita konsege hatama osan US$2,924 dólar, tanba ita prende evidénsia hamutuk 53, ne’e motorizada ho karreta hamutuk de'it”, informa nia.

Aleinde ne'e, kona-ba estasionamentu ilegál ne’ebé kontinua para karreta no motorizada iha área Palásiu Governu nia oin, nomós Embaixada Portugál nian ne'e, PNTL sempre avizu, maibé to’o agora ema nafatin para.

"Polísia Tránzitu sempre aviza beibeik liuhusi mídia katak, utilizadór sira labele para karreta no motorizada iha troatoar leten, tanba troatoar ne’e utiliza ba ema la’o ain. Maibé realidade, motorista sira laiha konsiénsia umanu, no kontinua para iha troatoar leten iha área Palásiu Governu oin nomós Embaixada Portugál nia, maske ita aplika ona selu koimas ba sira”, dehan nia.

Nune'e operasaun kona-ba estasionamentu ilegál sira-ne’e, sempre avizu ba komunidade atu respeita lei kódiku estrada, no sira lubuk ida mak pasa ona infrasaun ba sira.

"Maske nune'e Polísia Tránzitu kontinua implementa lei kódiku estrada bá sidadaun sira, atu nune’e sira bele konsiénsia no respeita kódiku estrada atu evita asidente rodoviáriu iha Timor-Leste”, hatete nia. (*)