Diretór DTT Baukau, Roberto da Cruz informa, kada fulan sempre hatama osan ba kofre estadu, maibé dokumentus kliente sira nia kontinua rai de'it iha rai, tanba laiha armariu atu tau.
"Prosesu ne'ebé la'o mak sai hanesan ne'e duni, planu pedidu halo ba, maibé dehan orsamentu la to'o buat sira ne'e hotu, tuir ami nia kapasidade ami nia matenek ne'ebé iha ami uza tali rafia kesi ba dokumentus rai de'it hanesan ne'e", dehan nia iha kna'ar fatin segunda (22/11).
Pedidu ne'ebé DTT Baukau, haruka ba nasionál atu husu armariu hodi tau kliente sira nia dokumentu, maibé to’o agora laiha resposta ruma.
Nia dehan, dokumentus tau de'it iha rai, otomatikamente sei aat hotu, maibé parte DTT Baukau uza mekanizmu kada fulan, muda dokumentus hirak ne'e ba mai atu labele hetan estragus.
Entertantu, funsionáriu servisu iha DTT Baukau, hamutuk ema na'in-14 ne'ebé kompostu husi permanente na'in-4 no kontratadu na'in-10. (*)