Tempotimor (Dili)-Sekretáriu Estadu Formasaun Profesionál no Empregu (SEFOPE) liuhusi Diresaun Nasionál Empregu Esterior (DNEE) sei organiza formasaun prelimináriu ba kandidatu Traballadór timoroan hamutuk atus-ida (100) ne'ebe mak sei ba hala'o servisu iha Korea Súl.
"Diresaun Nasional Empregu Exterior (DNEE), hakarak fó hatene ba kandidatu Traballadór (Korea Súl) nian katak ba sira ne'ebé mak foti kontratu, maibé seidauk tuir Preleminary Training (PT), katak iha loron 22 fulan-novembru 2021, sei hahú Preleminary Trainig ba kandidatu trabalhadór Korea 100 Pesoál, haree naran iha lista aneksu”, dehan Diretór DNEE, Filomeno Soares, liuhusi karta ne'ebé www.tempotimor.com asesu iha pájina ofisiál, kinta (18/11).
Tanba ne’e, husu atu kandidatu traballadór 100 ne'e bele asesu ba lista ne'ebé públika ona, atubele tuir formasaun prelemináriu ne’ebé sei realiza durante loron sia, hahú husi loron 22 novembru to’o 2 dezembru.
Fatin ne’ebé utilizadu ba formasaun prelemináriu iha Salaun SENAI Bekora, hahú tuku 08.00 to'o remata ho loron ne'ebé aneksa ona. (*)