"Objetivu fundamentál ohin ne'e atu fó sai fali saida mak halo ona. Ami-nia ekipa mak halo monitorizasaun problema frakeza no saida mak ita-boot sira, ami mai atu fó ba ita-boot sira atu haree lisuk, karik iha buat ruma laloos ha'u husu ita-boot sira atu fó feedback ruma”, dehan Provedór Adjuntu ba Área Boa Governasaun Di’ak, Jose Telo Cristovão Soares, Komandu Munisipál Manufahi, segunda (15/11).
Maibé hakarak simu rekomedasaun husi parte PNTL sira iha komandu tolu ba atividade ne'ebé mak PDHJ rasik seidauk kobre.
Nune'e iha falla ka frakesa ka atividade susesu ne’ebé mak PDHJ seidauk kobre husu PNTL fó sai hodi halo kompleta.
Rezultadu públiku husi monitorizasaun fatin detensaun iha komandu Munisípiu tolu ne'e atu halibur ideia husi Komandu sira hodi aprezenta rezultadu ikus atu labele mosu konfuzaun husi parte PNTL iha Munisípiu tolu ne'e rasik.
Komandante Polísia Nasionál Timor-Leste Munisípiu Manufahi, Superintendente Joni Viana das Regras, konsidera servisu PDHJ ne'e importante tebetebes hodi promove Direitu Umanu.
"Misaun ida PDHJ ne'e previlejiu tebes tanba iha ne'ebá atu promove Direitu Umanu e aumezmu tempu promove mós governasaun assuntu rua ne'e importante tebes”, dehan nia.
Tanba esforsu tomak ne'ebé mak PDHJ halo hakarak ema hotu moris ho livre no laiha presaun husi instituisaun no goza governasaun iha nasaun ida nia laran. (*)