Print this page

Governu Adere Regulamentu Internasionál Evita Ró-Ahi Soke Malu iha Tasi Laran

By November 11, 2021 722
Membru Governu sira partisipa hela reuniaun Konsellu Ministru iha Palásiu Governu, momentu balun liuba. Membru Governu sira partisipa hela reuniaun Konsellu Ministru iha Palásiu Governu, momentu balun liuba. Foto Suplay

Tempotimor (Díli)-Konsellu Ministru (KM) hala’o sorumutuk iha Palásiu Governu prezide husi Primeiru Ministru (PM), Taur Matan Ruak, aprova ona projetu proposta Rezolusaun Parlamentu Nasionál ba raktifikasaun ba adezaun Timor-Leste ba Konvensaun kona-ba Regulamentu Internasionál hodi evita ró-ahi soke malu iha Tasi-laran, husi tinan 1973.

"Ne'e iha konvensaun ida ne'ebé Governu ohin halo deliberasaun foin Governu aprova ohin sei haruka ba iha Parlamentu no Parlamentu sei liuhusi Plenária sei deside kona-ba Timor-Leste nia adezaun”, dehan Ministru Prezidensia Konsellu Ministru (MPKM), Fidelis Leite Magalhães, ba jornalista sira iha Palásiu Governu kinta (11/11).

Tanba Governu Timor-Leste konsidera konvensaun ne'e importante kona-ba Ró-ahi nian, ne'e hanesan rekézitu oinsá uza ahi oan no distánsia Ró sira no Sinál sira iha tasi laran.

"Forma kondusaun ró sira ne'ebé ita bele dehan ne'e hanesan regra tránzitu estrada nian mak ita sei aplika iha tasi sira”, esplika nia.

Konvensaun ne’e elabora atu garante seguransa navegasaun nian no atu estabelese regra navegasaun nian sira ne’ebé Ró sira tenke tuir no Ró sira seluk iha tasi-laran hodi evita Ró rua ka barak soke-malu.

Projetu proposta rezolusaun ida ne’e aprezenta husi Ministru Transporte no Komunikasaun, José Agustinho da Silva. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items