Print this page

Motorista Mikrolet Ezije Tarifa Pasajeiru iha DTT Baukau

By November 10, 2021 1207
Transpórte públiku mikrolet sira ne’ebé para hela iha resintu DTT Munisípiu Baukau, kuarta (10/11). Transpórte públiku mikrolet sira ne’ebé para hela iha resintu DTT Munisípiu Baukau, kuarta (10/11). Foto Tomas Freitas

Tempotimor (Baukau)-Motorista sira husi transpórte públiku mikrolet diresaun Vila Nova ba Vila Antiga Munisípiu Baukau ne'ebé ho marka A1 no A2 (Dalam Kota) halibur malu iha Diresaun Transpórte Teréstre (DTT) Baukau hodi ezije karta regra tarifa pasajeiru sira-nian atu taka iha karreta nia odamatan, tanba barak mak selu la tuir regra.

Reprezentante motorista, João Lorenco informa, tuir regras pasajeirus funsionáriu selu 0,25 sentavu no estudante sira selu 0,10 sentavu, maibé realidade pasajeirus la'os estudante mós selu tuir fali hanesan ema estudante.

Tanba ne'e, husu DTT Munisípiu Baukau fó regras tarifa pasajeirus nian hodi taka iha karreta nia odamatan atu pasajeiru sira bele haree no selu bazeia ba regras.

"Ohin karreta A1 A2 ami la halai, tanba pasajeirus sira la'os estudante mós selu fali sentavu sanulu-resin-lima (0.15), balun na’in-rua no tolu la'o hamutuk ami tula, tun selu de'it sentavu limanulu (0.50)", dehan João ba www.tempotimor.com iha resintu DTT Munisípiu Baukau, kuarta (10/11).

Nia afirma, dadaun mina karreta mós folin sa'e, litru ida ho folin US$1.10, maibé pasajeirus sira kontinua selu la lós bele fo impaktu ba estór loraik nian.

Nune’e, husu ba DTT Munisípiu Baukau fó regras, maibé bainhira seidauk fó regras tarifa mak mikrolet A1 no A2 sei la halo movimentu hanesan bai-bain.

Hatan ba preukupasaun ne'e, Diretór DTT Munisípiu Baukau, Roberto da Cruz prontu atu fó regras tarifa pasajeirus nian ba motorista sira atu taka iha karreta nia odamatan, nune'e bele sai matadalan ba pasajeirus sira bainhira atu selu.

"Agora ami buka hela arkivu ne'e, horsida hetan ami fó ba sira halai, se labiban entaun aban ami fó sai sirkular ba sira nafatin hanesan tuan nian", nia hatete

Antes ne'e, regras tarifa ne'ebé DTT Munisípiu Baukau fó ba motorista mak pasajeiru ema boot bainhira tau roupa bai-bain selu sentavus rua nulu resin lima (0, 25) no estudante selu sentavus sanulu (0,10).

Obsérvasaun jornalista www.tempotimor.com iha terenu nota katak, transpórte públiku ne'ebé tula pasajeirus husi diresaun postu baukau vila deskola ba postu hanesan  Baguia, Kelikai, Laga, Venilale no ba suku sira kontinua halo movimentu hanesan bai-bain, maibé transpórte públiku tula diresaun vila nova ba vila antiga mak la halo movimentu, tanba sei hein hela karta regras tarifa husi DTT. (*)

Rate this item
(0 votes)
Last modified on Wednesday, 10 November 2021 21:00
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items