Tempotimor (Díli) – Reprezentete povu iha uma fukun Parlamentu Nasionál (PN) husu emprezariu nasionál sira tenke kreativu hodi nune'e bele halo kompetisaun iha ASEAN, bainhira Timor-Leste sai ona membru ba ASEAN.
"Dezafiu ida mak ita nia emprezariu sira lakohi investe. Maibé, depende de'it ba projetu infraestrutura ne'ebé nia baze orsamentu mai husi Orsamentu Jerál Estadu (OJE). Tanba, ne'e iha empase. Orsamentu laiha atu selu kompañia sira, emprezariu komesa nakdoko. Tanba sira laiha rekursu fatin atu investe," hatete I Vise Prezidente Parlamentu Nasionál (VPPN), Maria Angelina Sarmento iha Parlemantu Nasionál, Tersa (03/09/19).
I Vise PPN ne'e dehan, emprezáriu nasionál tenke iha kreatividade atu dezenvolve negósiu iha Timor. “Ita nia problema mak iha Timor ladún asesu ba kreditu sira, no sira ne'ebé asesu ba kreditu mós labele dezenvolve rekursu ne'ebé mak sira asesu iha banku ne'e, atu investe," tenik VPPN.
Maria Angela husu mós ba emprezariu nasionál sira atu bele investe iha seitor turizmu. Liuliu dalan sira ne'ebé laiha. Nia dehan, karik Governu fornese, entaun emprezariu sira bele investe.
“Maski ida ne'e emprezariu kestiona, maibé emprezariu sira mós tenke halo auto avaliasaun ba sira nia an. Se sira bele investe karik, sira ein parseria ho emprezariu internasionál sira ne'ebé iha kapasidade no iha fundu," nia afirma.