Tempotimor (Baukau)-Sentru Treinamentu Ingtegral Dezenvolvimentu (CTID) Baukau hamutuk ho Autóridade Munisípal Baukau no reprezentante Sentretariu Estadu Formasaun Prófesionál no Empregu (SEFOPE) halo ona inaugurasaun ba aula prátika ba restaurante.

Prátika ne’e, atu kapasita formadór sira halo atendimentu públiku iha restaurante no bár ho di’ak.

Aula prátika restorante Haus Keping ne’e, konstrui husi SEFOPE ne’ebé ho orsamentu rihun US$31-resin no ohin hetan ona inaugurasaun.

"Inaugura aula pratika ba restorante Haus Keping liu-liu ba ita nia formadu sira atu pratika", informa Diretóra Fillas Delas Caritas Canossiana, Maria Filomena da Costa Freitas iha Sentru Treinamentu, Ingtegrál do Dezenvolvimentu Kolejiu Kanosa Baukau (CTID-sigla portugues) Vila Antiga, kuarta (27/10).

Aula ne’e, formandu sira uza ba prátika, nune'e formadu sira ba to'o iha fatin industria uza ekipamentus no hasoru vizitante husi estranjeiru labele lahakfodak.

Tanba ne’e, formasaun iha CTID Baukau durante fulan 8 ho programa asesment no finál mak prátika ne'ebé mak sei hala’o iha aula restaurante.

Nia afirma, liu husi aula pratika bár no restorante ne'e formadu sira sei prátika di'ak liu tán, tanba formadór sira fó liu oportunidade atu aprende.

"Ohin halo inagurasaun, husi parte sefope, INDIMO, ita nia autoridade Munisípiu no belun sira ne'ebé mak ami konvida atu mai haree ita nia alin sira durante tuir formasaun iha fatin ne'e, sira atende ita oinsa, buat ne'ebé mak sira aprende, sei atende ita di'ak liu tán", nia esklarese

Sorin seluk, reprezentante Indimo Nasionál, Amandio Belo hatete, sentru formasaun ne'ebé iha Munisípiu Baukau akreditadu ona.

"Bazeia ba nesesidade, ita fó ba sentru akreditadu sentru ne'ebé mak la akreditadu la tama iha sistema Indimo sei la rekuiñese la fó pakote formasaun ne'ebé mak ita dezenvolve", katak Amandio

Nune'e mós, Diretór Ajénsia Fiskalizasaun Munisípal, Bernardo Ornai husu ba CTID kanosiana Baukau, nafatin fó formasaun ba foinsa'e atu bele kompete iha aréa Hospitalidade nian.

"Presiza tebes ita hotu ajuda malu, la'os estadu de'it, maibé ba mós komunidade ne'ebé iha kompetensia propria ne'ebé sefope fó apoiu formasaun ba ita nia alin sira", dehan nia

Entertantu, formadu ne’ebé dadaun iha CTID ba aréa Hospitalidade hamutuk ema na’in 27. (*)