Tempotimor (Baukau)-Komunidade Suku Letemumo, Postu Administrativu Kelikai, Munisípiu Baukau kuaze tinan 10-resin halerik nafatin infraestrutura bázika.

Xefe Suku Letemumo, Paulo Moreirra Soares informa, komunidade sira iha suku Letemumo to'o ohin loron halerik nafatin ba bee-moos, eletrisidade, saúde no estrada.

"Ha’u-nia suku iha sentru, maibé bee-moos mak laiha”, dehan Paulo Moreirra Soares iha Aldeia Manume, sábadu (23/10).

Suku Letemumo iha aldeia lima, aldeia rua mak balun asesu ona bee-moos, maibé iha aldeia haat komunidade seidauk.

"Unamet nia tempu halo duni tanki ida iha ne'eba, maibé balun de'it mak uza, balun seidauk, mais aldeia haat ne'e bee-moos seidauk iha até agora", dehan Paulo

Alende ne’e, liña eletrisidade ne’ebé to’o ohin loron komunidade balun seidauk asesu.

Tanba iha área Uaibitai fulan hirak liuba vizita ona husi Primeiru Ministru (PM), Taur Matan Ruak ne’ebé promete atu dada liña eletrisidade, maibé to'o ohin loron la dauk realiza.

Komunidade parte Lebenei Leten sosa rasik matérial eletrisidade nian hodi dada liña eletrisidade, maibé parte Lebenei Kraik hanesan fatin Uluisigata, Astaunur komunidade barak mak seidauk asesu Eletrisidade.

"Sira totál 125 iha ne'eba seidauk asesu eletrisidade, husi aldeia ida de'it, liliu la hetan ne'e trinta-itál, ba iha parte leten Uaibitai área Laumana nian, ida ne'e seidauk dada duni", haktenik nia.

Komunidade nia halerik la’ós to’o iha ne’e de’it, maibe iha mós problema seluk hanean postu saúde no estrada ne’ebé sai preokupasaun boot.

Iha mós Postu saúde ne’ebé dook tebes husi komunidade kuaze kilometru-6, entaun susar tebes atu hetan lalais tratamentu bainhira iha moras ruma.

Tanba ne'e, kontinua husu ba Governu liuhusi ministéiru saúde atu hari’i postu saúde besik iha komunidade.

"Husu mós ba postu saúde sira ne'e, bele karik postu saúde ida koloka iha ne'e", dehan nia. 

Dala barak liiguais enkontru nível munisípiu, autoridade lokál sempre hato'o komunidade nia preokupasaun, maibé to'o ohin loron laiha rezultadu no bainhira inan isin rua sira atu partus, obrigatoriu tenke tula ho motorizada, dala ruma mós la’o ain kuaze kilometru-6 foin to'o sentru saúde kelikai.

Kazu balun, foin lalais komunidade ida moras gráve atu lori ba sentru saúde halo tratamentu, maibé la konsege salva mate de’it iha dalan.

"Estrada la di'ak, e pois postu saúde ne'e dook, ami mós perna hulan xefe aldeia nia kaben rasik ami hulan husi ne'e to'o hospitál kelikai", informa nia.

Relasiona ho problema estrada, dala barak CDO sira tuun to'o baze hamutuk ho autoridade lokál sira husi suku Baguia, Lakuliu, Abú, no Letemumo halo peskiza, maibé to'o ohin loron nafatin laiha rezultadu.

Kestaun hirak ne’e, nafatin husu ba na’in-ulun sira atu kria dezenvolvimentu ba povu, tanba dala barak indepedensia ne'e, boot sira de'it mak aproveita hodi sa'e karreta di'ak, maibé komunidade iha baze nafatin halerik.

Suku Letemumo kompostu husi Aldeia lima ho uma-ka’in 364 no populasaun hamutuk 3.598. (*)