"Ami mós sente katak ne'e risku ida, ita ho númeru ida boot ho delegasaun, ita iha aviaun ida, nia risku mais ita laiha dalan seluk. Kalendáriu ne'ebé komisaun organizadór fó ba ita, e ita kumpre, tanba ne'e mesmu ami sente iha risku maibé mós iha responsabilidade atu kumprei programa sira ne'ebé ita aseita ona”, dehan nia iha Aeroportu Internasionál Prezidente Nicolau Lobato, Dili, kinta (21/10).

Tanba Expo-Dubai ne'e nu’udar eventu internasionál ida ne'ebé konsentra husi ema barak, maibé Timor-Leste la hanesan ho nasaun seluk ne'ebé mak ba hatudu sira-nia produtu de'it, maibé Timor-Leste mós halo enkontru bilaterál iha setór lubuk ida ne’ebé Ministériu sira pertense ba.

Aleinde, Governu mós asina akordu transporte ba Aero nian, ne'ebé tenke hetan suporta husi tékniku sira iha prosesu pratikabilidade, tanba Timor-Leste seidaum iha ligasaun ho Aero ne'ebé funsiona loroloron.

"Ita talves semana ida ka semana rua iha aviaun dala ida, ne'ebé iha asuntu seluk liga ho pratikabilidade tanba ita-nia asesu ba uza tranporte atu sai ne'e limite”, hatete nia.

Ho ida ne'e, Governu deside membru delegasaun ho númeru boot, maibé atu aseita no kritika ruma, importante Governu kumpri kalendariu ne'ebé iha.

"Ha’u hanoin ida ne'e ita-bele haree ministériu no ajénsia ida-idak maneja nia osan tuir planu ne’ebé iha ona. Osan viajen, sira-nia iha ona e viajen ne'e mós iha apoiu husi sekretariadu komisaun organizadora iha expo nian. Ne'ebé iha mós apoiu subsídiu husi parte balun ba ekipa delegasaun no iha mós kontribuisaun serkos balun husi delegasaun nian. Ne'ebé ha'u hanoin katak la to'o iha level ne'e, tanba kada Ministériu iha nia planu osan ba viajen estranjeiru e sira ezekuta sira-nia osan”, dehan nia. (*)