"Programa seluk ne'ebé ohin informa mós ba eselénsia kona-ba iluminasaun sidade kapitál sira ne'e ba tinan ida ne'e ita halo programa ida ne'e ba Munisípiu hitu (7) ita halo ona konkursu agora iha faze avaliasaun nia laran" dehan Paulo da Silva ba Jornalista sira iha Palásiu Governu kinta (21/10).
Iluminasaun (lampu jalan) eletrisidade hahú husi Munisípiu Baukau no dadaun ne'e kompaña ida manán na'in tanba Prezidente Repúblika, Francisco Guterres ‘Lú Olo’ sei komemora loron 28 fulan-Novembru iha Munisípiu Baukau maibé Munisípiu seluk sei iha avaliasaun dokumentu ba kompaña sira.
"Entaun ita hahú uluk mak ida ne'e, entaun manán na'in agora iha tiha ona, agora restu sei avaliasaun faze dokumentu, prosesu la'o hela”, afirma nia.
Iluminasaun sidade ba Munisípiu hitu ne'e Governu prevé osan hamutuk milliun USD2 (Orsamentu Jerál Estadu tinan 2021) ne'ebé hahú iha Munisípiu Baukau, maibé Munisípiu Díli, Lautein, Manatutu Covalima, Likisá inklui Manufahi sei iha prosesu avaliasaun dokumentu sira. (*)
