Kompaña balun tau besi-rin eletrisidade iha Aldeia Osowake hahú kedas iha tinan 2015, maibé to’o dalan klaran paradu tiha no kontinua fali iha tinan 2019 hodi dada fiu metan to'o aldeia refere, maibé to'o ohin loron, komunidade seidauk asesu nafatin eletrisidade.
"Ami hare'e ba ai ne'e tama tiha ona iha varanda, maibé la tama ba uma laran", Xefe Suku Fatulia, Angelino Moises informa, ba www.tempotimor.com iha nia rezidensia fatulia, kinta (21/10).
Komunidade refere sidauk asesu ba naroman dezde ukun-an Timor-Leste nian to’o mai ohin loron.
Postu Adminsitrativo Venilale, Aldeia hamutuk 35, maibé úniku hela Osowake mak seidauk asesu ba eletrisidade.
Maibé, komunidade sira ne'ebé hela iha aldeia Osowake, kompostu husi suku tólu hanesan, Suku Osouala, Postu Administrativu Vemasse, Builale Postu Administrativu Ossu no Fatulia, Postu Administrativu Venilale.
Populasaun ladauk asesu ba eletrisidade ne’e, fó implikasaun boot ba estudante sira nia estuda iha tempu kalan.
Nune'e hanesan autoridade Suku nafatin levanta preokupasaun hirak ne’e ba governu liu husi meius oi-oin atu bele toma responsablidade hodi buka solusaun. (*)