Diretór Nasionál Empregu Exteriór Husi Sekretáriadu Estadu Formasaun Profesionál no Empregu (SEFOPE), Filomeno Soares hatete, traballadór timoroan hamutuk 60 ne'ebe atu ba hala'o servisu iha Korea Súl, iha traballadór tuan na’in-19, no traballadór foun hamutuk na'in-41. 

"Totál hamutuk iha na'in-60, kompostu husi traballadór tuan, hamutuk nain-19, depois foun ne’ebé mak foin bá, iha área pábrik ne'e na'n-16, nomós iha área peska hamutuk na'in-25”, esplika nia iha Aeroportu Internasionál Prezidente Nicolao Lobato Dili, kinta (21/10).

Haree ba viajen husi traballadór sira ne’e sei marka tán istória ida ba traballadó timoroan sira, tanba hahú ohin ba oin Governu Korea súl komesa loke ona oportunidade atu simu hikas traballadó sira.

Ba rekezitu ne'ebé mak Governu Korea fó Timor-Leste ne'e, traballadór ne'ebé atu ba Korea Súl, tenke kumpre protokolu Covid-19 husi Organizasaun Saúde Mundiál (OSM).

"E agora dadauk ita hotu hatene katak traballador sira halo izolamentu ba loron ida kalan ida, iha Otel haat ne'ebe agora dadauk iha Dili laran. Depois sira kuandu ba to’o iha korea sira sei hetan tán kuarentena 14 dias depois hotu sira foin tama ba halo servisu”, afirma nia.

Iha situasaun ne'e, SEFOPE mós hala'o preparasaun ne'ebé di'ak atu nune'e labele hetan faillansu balu ne'ebé akontese, wainhira traballadór hala'o viajen ba Korea Súl.

Enkuantu orsamentu ba bilete viajen ne'e sei prepara husi kada Traballadó sira inklui sira rasik mak prepara osan rezerva atu selu kuarentena iha Kore Súl.

“Ita hothotu hatene katak investimentu ne'ebé mak Governu halo fó formasaun lian-korea ba traballadór sira maibé investimentu ne’ebé mak selu atu ba Korea ne'e sira na'in rasik mak seluk”, hatete nia.

Aleinde traballador na'in-60 ne'e dadauk kumpre ona kuarentena  iha Otél, no osan ne'ebé atu selu kuarante ne'e mai husi kada traballadór ho montante US$150.

"Purtantu ida ne'e mak sai difikuldade ba traballadór sira atu prepara osan hodi bele halo kuarentena ba sira-nia an. Ida ne'e kritériu husi Governu Korea nian ne’ebé relata mai atu halo tuir”, dehan nia. (*)