Print this page

PN Submete Ona Proposta OJE 2022 ba Komisaun C

By October 19, 2021 836
Prezidente Parlamentu Parlamentu Nasionál (PN), Aniceto Longuinhos Guterres Lopes. Prezidente Parlamentu Parlamentu Nasionál (PN), Aniceto Longuinhos Guterres Lopes. Foto Suplay

Tempotimor (Dili)-Prezidente Parlamentu Parlamentu Nasionál (PN), Aniceto Longuinhos Guterres Lopes, deside submete ona Proposta-lei Orsamentu Jerál Estadu (OJE) tinan fiskál 2022 ba Komisaun C (Trata Asuntu Finansa Públika) atu halo preparasaun ba relatóriu no paresér, iha loron-tersa (19/10).

"Tanba ne'e konvida Prezidente Komisaun C mai atu simu proposta de lei OJE 2022, atu aprezenta relatóriu paraser”, dehan Aniceto hafoin entrega Proposta-Lei OJE 2022 ne'e ba Prezidente Komisaun C Trata asuntu finansa públika, Maria Angelica Rangel, iha plenária Parlamentu Nasionál (PN), tersa (19/10). 

Hafoin admisaun proposta OJE ba komisaun C, Prezidente PN deside entrega mós servisu balun ba komisaun A, B, D, E, F, to'o G atu prepara mós pareser setoriál hodi junta hamutuk ho relatóriu pareser husi Komisaun C nian, depois aprezenta ba meza Parlamentu Nasionál atu debate.

Iha Proposta-lei OJE 2022 ne'e totál montante hamutuk billaun US$1,675 ne'ebé sei uza hodi finansia programas 45 liuhusi prioridade nasionál neen (6)  hanesan, Dezenvolvimentu Kapitál Umanu, Abitasaun no Inkluzaun Sosiál, Setór Produtivu, Ambiente no Konetividade, Dezenvolvimentu Setór Privadu no Kooperativa, Dezenvolvimentu Rurál, no  Boa Governasaun

Husi totál montante refere sei aloka ba Transférensia Públika ho montante tokon US$565,9. Bens no Servisus tokon US$449,8. Kapitál Dezenvolvimentu tokon US$401.7. Saláriu no Vensimentu tokon US$233 no Kapitál Menor tokon US$24,4.

Enkuantu ba prioridade nasionál 6 as liu mak iha Setór produtivu sira (Agrikultura no Turizmu), Ambiente no Konetividade ho alokasaun 27%. Depois mós Abitasaun no Inkluzaun Sosiál 22%, Boa Governasaun 12%, Dezenvolvimentu Kapitál Umanu 10%, Dezenvolvimentu Rurál 3% no Dezenvolvimentu Setór Privadu 0,5%. Purtantu, ba funsionamentu mákina Estadu ne'e hetan alokasaun 18% no atividade seluk kuaze 8%. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items