Prezidente Kámara Komérsiu Indústria Timor-Leste (CCI-TL), Oscar Lima hatete lia hirak ne'e ba tempotimor.com iha ninia knaar fatin, Akait, Díli, Tersa (27/08/19).
"Ita ne'e estadu. Tanba iha Prezidente Repúblika, Primeiru Ministru, Judisiariu no Parlamentu Nasionál. Tan ne'e, tenke haree ba ita nia emprezáriu nasionál atu bele kompete netik iha ASEAN. Selae, kuandu ita tama ona ASEAN, ita la konsege kompete ona," dehan Oscar Lima.
Nia dehan, TL atu lori saida mak fa'an ba rai liur. Kompetisaun ho ema iha osan mai halo investimentu iha Timor, selu pursentu ida no rua. Maibé, ita iha ne'e foti para halo ita nia atividade ekonomika selu % 12. “Oinsá mak ita bele kompete? Hanesan emprezáriu labele kompete. Maibé, tama ASEAN ita presiza,” nia hatete tan.
Nu'udar Prezidente CCI-TL, Oscar Lima informa mós kestaun hirak ne'e ba ekipa ne'ebé responsavel ba Timor-Leste nia adezaun ba ASEAN, para hato'o ba Governu hodi prepara kondisaun ba emprezáriu nasionál.
"Ami La obriga Governu. Maibé, Governu hanoin oinsá para prepara nia seitor privadu ka nasionál, para iha loron ida ita tama ba ASEAN, seitor privadu sira prepara ona para kompete netik buat balun,” Oscar haktuir.