"Hakarak agradese ba señór Reitór ne'ebé mak fó espasu ba kréditu uniaun ne'e bele moris iha ETCI nomós estrutura hotu ne'ebé akompaña nafatin sira ne'ebé mak bele sai di'ak liután nune'e bele Mobiliza Dosente sira hotu”, dehan Elizáriu Ferreira, iha Salaun ETCI Gleno-Ermera, sesta (09/10).
Prezidente Kréditu Uniaun-Rai Osan Hamutuk Liberta Oan Ki'ak (CU-ROHALIK), Mário Madeira hatete, ho kooperativa Kréditu Uniaun ne’ebé hari’i atu apoiu fundus ba dosente no estudante sira iha East Timor Coffee Institute (ETCI).
"Objetivu prinsipál atu loke kooperativa ne'e atu ajuda estudante sira oinsá hasoru sira-nia dezafiu iha Orsamentu ka fundus ruma sira la sufisiénte, husi kooperativa ne'e bele apoiu sira inklui dosente no estudante sira”, dehan Mário Madeira.
East Timor Coffee Institute (ETCI) hahú husi grupu Cinco Irmaun ikus mai konsege hari’i Kooperativa Kréditu Uniaun iha East Timor Coffee Institute (ETCI) ne'ebé mai husi funsionáriu no estudante sira.
Tanba ETCI hanesan institutu ida ne'ebé estudu kona-ba oinsá halo produsaun kafé iha Munisípiu Ermera nian.
Dadaun ne'e sai membru sira iha Kooperativa CU-ROHALIK de'it maibé sei halo promosaun ba komunidade sira iha Munisípiu Eremra nia hodi nune'e bele asesu ba kooperativa kréditu Uniaun ne'e.
"Oinsá atu dezenvolve didi’ak kooperativa ne'e hodi promove CU-ROHALIK no sei halo promosaun ba komunidade sosiedade sira la'ós ba estudante Dosente de'it maibé ami sei nakloke ba komunidade kbi’it la’ek sira atu asesu hodi ajuda sira”, afirma nia.
Haree ba prinsipiu husi kooperativa CU-ROHALIK katak husi komunidade ba komunidade filafali ba komunidade.
Konseleiru CU-ROHALIK no Reitór ETCI, Lucio Marcal Gomes, husu ba dirijente sira tenke halo di'ak hodi foti Kooperativa Kréditu Uniaun ne'e ba oin.
"Orsida ita simu tiha tomada de posse ne'e ita tenke servisu didi’ak ba maluk sira estrutura kooperativa ne'ebé simu tomadade de posse ne'e sai hanesan responsabilidade boot ba ita-boot sira e tenke hala'o buat ne'e lori to'o rohan”, dehan nia.
Antes ne'e membru CU-ROHALIK hamutuk 30 mak simu ona formasaun husi SEKoop liuhusi diresaun Kréditu Uniaun iha Munisípiu Díli.
Tanba CU-ROHALIK hahú husi funsionáriu na’in-liman ne'ebé mak hala'o uluk grupu ida ho naran "Cinco Irmãos " maibé Sekretariu Estadu Kooperativa Elizáriu Ferreira fó hanoin katak labele haree grupu maibé muda sai ba kooperativa atu nune'e komunidade sira asesu hotu.
Dadadaun CU-ROHALIK iha membru foun sira hamutuk feto 12 mane 18 inklui konseleiru nai’in-5 ho nia totál hamutuk 35 no agora dadaun sei la'o hela ho fundus ne'ebé hari’i husi Cinco Irmãos ne'ebé ho osan Montante US$800 tanba Cinco Irmãos mak transforma sira CU-ROHALIK. (*)