“Tanba durante ne'e kustu ba manutensaun boot tebes ba karreta sira, tanba ne'e mak iha OJE 2022, ministériu sira ne'ebé hato'o proposta sosa karreta sei la hetan aprovasaun, so de'it sosa karreta funeráriu, karreta ambulánsia no karreta ba polísia no F-FDTL nia, restu sei la hetan hotu autorizasaun”, dehan Ministru Francisco Martins, iha Plenária, PN, Segunda (04/10).

Iha tinan 2022 ida-idak sei la uza karreta rasik, patrimoniu Estadu ne'e sei konsentra iha fatin hotu, no tau iha fatin ida de'it, ema ida-idak sei la lori karreta ba fati-fatin.

“Diretór jerál sira mós sei la uza ona karreta rasik, nia sei uza bainhira nia halo servisu, nia halo servisu hotu karreta tenke para iha sentrál, nível nasionál no nível munisipál hothotu mós hanesan, karreta ne'e sei tau hotu iha nia fatin, atu halo siervisu  mak foin uza, maibé nia ba uma sei ba de'it, (la'o de'it)”, informa nia.

Funsionáriu sira sei hetan renumerasaun ba subsídiu ida ba ninia transporte ne'ebé mak hetan kada fulan. Tanba rezolusaun dekretu lei halo ona no fó sai ona iha públiku, hein de'it prezidente Repúblika (PR) promulga , no bainhira promulga hotu ezekuta ona. (*)