“Husi ami-nian, ami apoiu dez milhões ba konstrusaun Biblioteka Nasionál maibé iha mós kustu adisionál ba konsultan ne'ebé ami selu nomós ami tempu no skill ne'ebé kompaña ami iha prosesu selesaun nomós tenderizasaun nomós ami iha ekipa ne'ebé kontinua serbísu hamutuk ho Sekretáriu Estadu Arte no Kultura no Autoridade Nasionál Petroleo no Minerais (ANPM) atu kontinua monitoring prosesu konstrusaun sira ne'e hotu”, dehan Angelina Baptista Branco iha Rezidénsia Priemiru Minstru, Taur Matan Ruak, Faról, segunda (04/10).
Iha fulan-Agostu tinan 2017, Kompaña ENI halo moru no drainajen Biblioteka Nasionál iha Ajensia Dezenvolvimentu Nasionál nia kotuk iha Hudi Laran ne'ebé finaliza ona iha fulan-Abríl tinan 2019.
Sekretáriu Estadu Arte no Kultura (SEAK), Teófilo Caldas hatete, sira hetan xamada husi Primeiru Ministru atu partilla kona-ba konkursu públiku Biblioteka Nasionál ne'ebé hetan apoiu husi Empreza ENI.
"Primeiru, ne'e Xamada ida husi sua eselénsia Primeiru Ministru mai Sekretáriu Estadu Arte no Kultura, no Empreza ENI no Autoridade Nasionál Petroleo no Minerais (ANPM), parte tolu ne'e mai hasoru sia eselénsia Primeiru Ministru ami mai objetivu partilla informasaun kona-ba prosesu tenderizasaun Biblioteka Nasionál”, esplika Teofilo Caldas.
Kompaña hamutuk 18 husi Nasionál no Internasionál ne'ebé hili Kompaña neen (6) ne’ebé hala'o hela prosesu internál kompaña nian atubele halo selesaun ba kompaña neen no final iha tinan 2021 ne'e sei públika sai.
Biblioteka Nasionál ne'ebé hari’i atu juventude atu asesu ba livru sira tanba kultura Timór lé livru menus liu tanba ne'e mak obriga joven sira atu lé.
Livru ne'ebé mak prepara atu tau iha Biblioteka Nasionál hamutuk 8.000 resin ne'ebé hakerek husi akademista Timoroan sira no balun sei kontinua hakerek no peskiza nafatin. (*)