“Ami-nia relatóriu no paresér kona-bá espesialidade aprezenta ona meza parlamentu nasionál no Prezidente Parlamentu Nasionál mak bele halo ajendamentu ba diskusaun finál globál iha plenária”, informa Prezidente Komisaun C, deputada Maria Angelica Rangel, iha Parlamentu Nasionál, kuarta (29/09).

Dadauk, relatóriu no paraser kona-ba diskusaun espesialidade ba proposta Lei Enkuandramentu Orsamentu hodi substitui Lei Orsamentu no Jestaun Finanseira (LOGF), iha komisaun C konklui ona.

Tanba ne'e, kuandu Parlamentu Nasionál konsege aprova iha finál globál mak sei submete ba Prezidente Repúblika (PR), atubele hetan promulgasaun.

Bainhira lei ne'e Xefe Estadu promulga mak Governu sei hatama fali proposta lei grande opsaun, nune’e bele define investimentu boot iha infraestrutura nian.

Maibé, Lei Enkuadramentu Orsamentál (LEO) ne’e rasik, seidauk bele aplika iha Orsamentu Jerál Estadu (OJE) 2022 tanba parlamentu seidauk aprova iha finál globál.

Iha kontiudu husi Lei ne’e rasik hakerek katak antes Orsamentu Jerál Estadu hatama tenke hatama ho programa orsamentu iha fulan-juñu. Signifika katak programa hatama uluk mai iha fulan-juñu.

Ho ida ne'e, OJE 2022 ne’e la biban ona, tanba liu tiha ona períodu ne'ebé estabelesidu husi Lei refere, tanba ne’e mak hanoin katak implementasaun lei refere tenke realiza iha tinan 2023. (*)