Xefe Bankada Kmanek Haburas Unidade Nasionál Timor Oan (KHUNTO), Olinda Guterres hatete, nia parte hakarak repete hikas subsídiu frontline nian ba Governu atu rezolve tanba Governu la'ós laiha osan.
"Ha’u hakarak repete filafali, polísia sira ne'ebé mak halo seguransa iha fronteira, sira tenke simu ona sira-nia subsídiu. Ita osan iha, ema balun hatete dehan ita osan laiha mais ha’u hatene ita osan iha”, dehan nia, iha debate renovasaun Estadu Emerjénsia ba dala-18 iha plenária PN, tersa (28/09).
Bankada KHUNTO konsidera Governu halo deskriminasaun ba polísia sira tanba subsídiu ne'e Governu fó de'it mak sira ne'ebé servisu iha fronteira no la fó ba sira ne'ebé mak servisu iha Dili laran.
"Hau’ rona fali informasaun dehan katak Governu foti de'it polísia sira ne'ebé mak seguransa iha fronteira ida ne'e mak sei hetan subsídiu, maibé ne'e Governu halo sala, Governu halo deskriminasaun”, afirma nia.
Tanba ne'e, KHUNTO nia hakarak Governu tenke akumula hothotu polísia sira hahú husi komdante to'o nia ajente sira, tenke hetan hotu, tanba iha komendante mak foin iha soldadu, inklui iha soldadu mak foin iha komandante.
Husu mós ba Governu, atubele fó perdiam US$40 kada loron ba polísia sira ne'ebé la'o servius iha Dili laran, hodi koloka sira ba fó seguransa iha fronteira.
"Ha’u husu favór boot ida, frontline sira-nia osan selu ona, lalika dada tán, la’e orsida ema dehan ita osan laiha, ita-nain tolu halo ukun ne'e, selu ona ba be hodi ema gava ita", dehan nia.
Deputada bankada Partidu Demokrátika (PD), Elvina Sousa, ejize Governu atu aselera ona pagamentu osan ba pesoál liña frente sira, ne'ebé durante ne'e sakfika-an hodi hala'o servisu iha risku ba pandemia covid-19.
Deputada Bankada Opozisuan CNRT, Maria Fernanda Lay, dezafia ho Governu nia atendimentu kona-ba selu osan ba ekia liña frente sira-nian.
"Subisídiu frontline, iha ne'e ha’u hakarak hato'o katak, dekretu lei, prezidente repúblika veta, no foin hadi'a, maibé lista seidauk prontu, ida ne'e hakarak hatete saida, enkuantu dekretu lei aprovadu husi Konsellu Ministru hodi hato'o ba Prezidente Repúblika, Ministériu sira la prepara lista, ba sira ne'ebé sei benifisia ho subsídiu ne'e, to'o bainhira atu selu,”, hatete nia.
Tanba, foin lalais liuhusi telivizaun, Ministériu Saúde, rasik deklara katak dadauk sira sei prepara lista, maibé lahatene bainhira mak selu, ida ne'e mak problema. (*)
