"Ami ko’alia kona-ba programa futuru Uniăo Europeia ho Timor-Leste, ami komesa agora prepara programa iha ámbitu rekuperasaun ekonómika, dezenvolvimentu ekonómiku, iha ámbitu ba programa ne’e, iha importánsia tebtebes ba formasaun profesionál”, dehan Embaixadór Uniăo Europeia (UE), Andrew Jacobs, iha SEFOPE, Kaikoli, tersa (28/09).
Apoia UE nian kona-ba atu hala'o formasaun profesionál ba foinsa'e sira ne'e, parte rua sei servisu hamutuk halo identifikasaun ba sentru formasaun hirak ne'ebé durante eziste ona iha Timor-Leste, molok fasilita formasaun.
Dadaun ne'e, parte rua hahú ona halo identifikasaun uluk ba prioridade sira hodi loke oportunidade servisu hamutuk, dezenvolve empregu ki'ik sira iha rai laran.
"Agora ami ko’alia kona-ba posibilidade apoiu sentru formasaun iha área rurál ne'ebé durante ne'e la hetan oportunidade ba formasaun profesionál, atu halo dezenvolvimentu ba ekonómia lokál, atu ajuda toos na'in kuda produtu seluk, ai-fuan seluk, ai diferente, atu atinje nível ekonómiku diferente iha área rurál”, hatete nia.
Sekretáriu Estadu Formasaun Profesionál no Empregu, Alarico de Rosário hatete, durante halo diskusaun, Governu Uniăo Europeira hakarak, foka ba área formasaun profesionál nian juventude sira iha área rurál, oinsá hasa'e sira-nia abilidade hodi hakbi'it dezenvolvimentu ekonómia iha rurál.
"Ne'e mak ohin ami tuur hamutuk ko’alia, sira prontu atu apoiu, servisu hamutuk ho SEFOPE hodi haree liliu ba área formasaun, nomós ba auto-empregu sira ne'ebé mak durante ne'e SEFOPE kria hela iha baze ne'ebá. Entaun ida ne'e SEFOPE mós orgullu simu sira sai hanesan parseiru di'ak ida ba SEFOPE, atu nune'e bele hodi tulun ita-nia joventude sira liliu ba área agrikultura”, nia hakotu.
Tuir dadus ne'ebé rejistadu iha sistema SEFOPE nian, sentru formasaun sira ne'ebé eziste ona iha teritóriu tomak, hamutuk 229, iha 25 mak hetan akreditadu, 95 foin mak hahú halo rejistasaun dadauk, no 109 mak sai hanesan sentru komunitária iha baze. (*)