Ho aprovasaun Konsellu Ministrus ne’e, ba oin Ministériu Finansas sei hahú prepara Livru I to’o Livru VI Proposta Lei Orsamentu Jerál Estadu tinan 2022 inklui dokumentu adisionál sira no Governu sei entrega ba Parlamentu Nasionál iha loron 15 fulan-outubru 2021.

Tuir informasaun ne’ebé www.tempotimor.com asesu iha pájina ofisiál Ministériu Finansas, segunda (27/09) katak, Ministériu Justisa mós prepara ona persetajen ba prioridade ne'ebé mak Governu sei aplika no fokus ba OJE tinan 2022.

Tanba alokasaun orsamentu 2022 tuir prioridades nasionál 6 ne’ebé aa liu iha setór produtivu sira (agrikultura no turizmu), ambiente no konetividade ho alokasaun 27%.

Tuir kedan ho abitasaun no inkluzaun sosiál 22%, boa governasaun 12%, dezenvolvimentu kapitál umanu 10%, dezenvolvimentu rurál 3% no dezenvolvimentu setór privadu 0,5%. Maibé ba funsionamentu mákina Estadu hetan alokasaun 18% no atividade seluk 8%.

Haree ba alokasaun orsamentu aprovadu ba OJE 2022 tuir klasifikasaun ekonómiku as liu mak iha transférensia públika ho montante millaun US$565,9. Tuir kedan ho bens no servisus millaun US$449,8. Kapitál Dezenvolvimentu ne’ebé bele kria kampu traballu no jere empregu rai-laran hetan alokasaun millaun US$401,7. Saláriu no Vensimentu millaun US$233 no Kapitál Menór millaun US$24,4. (*)