"Ha'u fó ona orientasaun ba IGE, atu kontinua halo identifikasaun ba mota risku inundasaun, atubele halo normalizasaun no hasai sedimentasaun, nune'e akontese udan boot, labele fó risku ba populasaun", dehan Ministru Salvador, iha Palásiu Governu, kinta (23/09).
Tanba ne’e, IGE hahú ona atividade iha mota sira ne'ebé identifikadu risku ba inundasaun hanesan Ponte Bekussi, Maloa no seluk tan iha kapitál Dili.
"Ita husu IGE antisipadamente prepara ekipamentus, pezadu iha mota no hahú servisu tanba udan hahú dadaun ona”, informa nia.
Aleinde ne'e Komisaun Nasionál Aprovizionamentu (CNA) hahú loke konkursu públiku atu halo rekuperasaun ba infraestrutura iha fatin liman ne'ebé hetan estragu tanba dezastre naturál ne'ebé akontese iha loron 04 Abríl.
Projetu iha área lima kompostu husi ponte no estrada ba maloa, estrada ai-lok laran ba RTK, estrada iha Ospital Nasional Guido Valadares (HNGV) nia kotuk, no estrada ligasaun tibar ba Ermera inklui ponte Bekussi-Bekora.
Ekipa task force finaliza ona dezeñu detalladu ba estrada iha Ponte CPLP ba Bebonuk, maibé sei aprezenta ba komisaun Administrasaun Fundu Infraestrutura (KAFI) atu aprova, hafoin CNA loke konkursu publiku. (*)