"Ha'u hakarak agradese ba administradór Munisípiu, komandante polísia, komandante eskuadra sira, OPS (Ofisiál Polísia Suku), na'i Xefe Suku sira, administradór postu sira, tanba imi-nia kontribuisaun mak, distribuisaun sesta bázika ne'e bele susesu, e parabéns ba ita-boot sira", hatete Elizário Ferreira, iha resintu administrasaun Munisípiu Lautein, sesta (17/09).

Bainhira partidu Frente Revolusionáriu Timor-Leste Independente (Fretilin), ba viabiliza Governu, simu kedas mensajen ida husi Prezidente Repúblika (PR), Francisco Guterres "Lú Olo", katak povu tenke iha kondisaun dignu ba saúde alimentár, nune'e sira hamosu kedas programa rekuperasaun ekonómika.

"Oinsá nafatin hán, maske iha situasaun serka sanitária. Tanba ida ne'e, husi pontu 71, mak sai hanesan pontu prinsipál rekoperasaun ekonómiku, e pontu primeiru katak, populasaun presiza rekupera sira nia ekonómia. Entaun, distribuisaun sesta bázika ne'e, parte ida husi solusaun ba pontu 71 nian", haktuir Elizário.

Administradór Munisipiu Lautein, Domingos Xavio, agradese ba governu liuhosi SEKoop, nomós ho kompañia fornesedór sira, tanba ho esforsu hodi distribui ona ai-hán ba populasaun sira iha Munisípiu refere.

"Ha'u fahe sesta bazika to'o remata, iha evaluasaun ida katak, ida di'ak liu ne'e monu iha Munisípiu Lautein. Ita agradese. La'ós di'ak hotu, maibé iha problema ki'ik oan konsege rezolve e susesu. Ida ki'ik oan ne'e ita rezolve", afirma nia. (*)